VOV4.Bahnar - Pơgê brei 22/11, Thủ tướng Phạm Minh Chính pơm tơm khŭl Việt Nam, atŭm hăm Kơdră chĕp pơgơ̆r rim tĕh đak ASEAN păng Kơdră chĕp pơgơ̆r Tĕh đak Tung Quốc Tập Cận Bình vang Hop akŏm trư̆k tuyên Khŭl kơdră kơpal tơbăt 30 sơnăm năr tơgoăt tơgoăl pơma dơnŭh ASEAN - Trung Quốc.

Iung pơma tơ̆ Hop akŏm, lăng trŭh tơ̆ hơnăp kơnh, Thủ tướng Phạm Minh Chính pơma hơdăh ASEAN păng Trung Quốc kăl hơnơ̆ng hơmet pơ ‘lơ̆ng jơhngơ̆m đon lui kiơ̆ dĭh băl kơ jăp păng atŏk kơtang jang hơdoi tôm tong, atŏk loi dơ̆ng tơdrong iŏk đei jơnei, lăng trŭh dôm tơdrong jang hơ iă hlŏh dơ̆ng, đei iŏk yua jơ̆p jang hlŏh dơ̆ng ăn tơdrong tơgoăt tơgoăl ASEAN-Trung Quốc. Thủ tướng sơkơ̆t hơdăh, ‘moi kiơ̆ tơdrong tơgoăt tơgoăl tĕh đak tơ jê̆, jang hơdoi joăt joe ‘lơ̆ng hơ iă hăm Trung Quốc, Việt Nam gô hơnơ̆ng hơdrin tơgop pơm pơ ‘lơ̆ng hlŏh dơ̆ng ăn tơgoăt tơgoăl ASEAN-Trung Quốc atŏk tơ iung tơgăl hăm trong tơlĕch jang tôm tong, tơgop gĭt kăl lơ̆m hơmet pơ ‘lơ̆ng, atŏk kơtang rơngei hiôk hian, sơđơ̆ng dơ̆ng kơ jăp, jang hơdoi, atŏk tơ iung kơ jăp ‘lơ̆ng tơ̆ lơ̆m tơring păng lơ̆m apŭng plĕnh tĕh, hơnhăk đei iŏk yua ‘lơ̆ng hơ iă ăn rim tĕh đak păng ăn tơdrong phĭ tơtŏ dơnŏ ‘lơ̆ng păng hơnŭk hơnoa kơ rim kon pơlei, ư̆h kơ lê̆ bơngai bu hơchăng tơ̆ rŏng.

Tơblơ̆ nơ̆r: Amazưt