VOV4.Bahnar - Pơgê năr 8/10, tơ̆ Hà Nội pơgơ̆r Hop akŏm trư̆k tuyên lơ̆m tĕh đak Pơtôch bơ̆ jang vei lăng kon kông 9 khei blŭng sơnăm păng tơlĕch tơdrong jang tơm lơ̆m 3 khei hơtuch sơnăm 2021. Hop akŏm hlôi mơ̆ng nơ̆r tơgop đơ̆ng kơdră tang măt rim tơring đei kon kông oei lơ. Rim nơ̆r tơgop akŏm tơbăt hơdăh dôm tơdrong jang iŏk đei jơnei lơ̆m vei lăng năng tông kon kông, adoi nhen jang tang găn jĭ hơbŭh Covid tơ̆ tơring kon kông, groi kông. ‘Ngoăih kơ ‘nŏh, rim nơ̆r tơgop jei tơ ƀô̆h hơdăh dôm tơdrong tơnap tap, tơhlăk tơhlĭn lơ̆m jang kiơ̆ tơgŭm djru lơ̆m chăl hle, adoi tơlĕch ăn trong hơmet pơ ‘lơ̆ng. Iung pơma tơ̆ Hop akŏm, Kơdră chĕp pơgpơ̆r Dơnŏ anĭh vei lăng kon kông Hầu A Lềnh tơbăt, lơ̆m khei ‘năr jĭ hơbŭh Covid oei hơnơ̆ng pơrăm kơtang, rim hơnĭh bơ̆ jang vei lăng kon kông đơ̆ng Trung ương trŭh tơ̆ tơring kăl hơdrin đĭ jơhngơ̆m iung jang, iung jang hơdoi hăm rim khŭl chĭnh trĭ, vă trong bơ̆ jang tơgŭm djru kon kông păng groi kông đei iŏk jơnei hơ iă.

Tơblơ̆ nơ̆r: Amazưt