VOV4.Bahnar - Pơ gê 16/3/2021, tơ̆ anĭh jang kơ Khul kơ dră tĕh đak, Thủ tướng Nguyễn Xuân Phúc pơ gơ̆r Hop akŏm trư̆k tuyê̆n lơ̆m tĕh đak pơ tôch 5 sơ năm bơ̆ jang đơ̆ng Grŭp jang kơ Thủ tướng tĕh đak. Hăm trong jang pơ jing Khul kơ dră tĕh đak tơ păt ‘lơ̆ng, bơ̆ jang, pơ vih ăn kon pơ lei păng anĭh tĕch mơ dro, Thủ tướng đei tơ drong pơ cheh pơ jing Grŭp jang ăn Thủ tướng lơ̆m khei 8/2016 păng Grŭp hlôi tơ gop gĭt kăl vă bơ̆ jang kiơ̆ trong jang đơ̆ng Khul kơ dră tĕh đak.

Tơ chĕng ‘lơ̆ng Grŭp jang hlôi jang đang dôm tơ drong đei Thủ tướng pơ jao, Thủ tướng akhan, Grŭp jang pơ jing tơ drong ‘lơ̆ng gĭt kăl, tơ gop tôch lơ ăn tơ drong jơ nei lơ̆m tơ drong chĕp kơ̆l pơ gơ̆r đơ̆ng Khul kơ dră tĕh đak, Thủ tướng tĕh đak jăl jang âu. Mă lei, Thủ tướng athei dôm anĭh tơm, dôm tơ ring ưh gơ̆h lăng pơ hơi, ưh gơ̆h lăp đon hăm dôm tơ drong iŏk đei, mă athei hơ nơ̆ng chĕp kơ̆l pơ gơ̆r, jang mă pran dôm tơ drong jang đei pơ jao. Đe ƀok kơ dră athei pơ gơ̆r sek tơ lang kĕh dôm tơ drong oei hre hla ar chih hơ găt, pơ jao dôm tơ drong ‘lơ̆ng hlŏh ăn jăl jang kơ Khul kơ dră tĕh đak ‘nao.

Dơ̆ng: Tơ blơ̆