VOV4.Bahnar - Pơgê năr 4/6 tơ̆ Hà Nội, Kơ iĕng Thủ tướng Tĕh đak Lê Văn Thành – Kơdră chĕp pơgơ̆r Trung ương găh tang găn tŏ ‘mi kial pơrăm pơm tơm hop akŏm trư̆k tuyên lơ̆m tĕh đak găh bơ̆ jang tang găn tŏ ‘mi kial pơrăm păng tơchă dŏng sơnăm 2021 tơ̆ hơnĭh pơgơ̆r tơm kơ Dơnŏ anĭh bơ̆ jang Khŭl kơdră Tĕh đak. Hop akŏm pơma dơnŭh hơlen hơdăh đĭ đăng tơdrong jang tang găn tŏ’mi kial sơnăm 2020, ‘moi kiơ̆ dôm trong jang iŏk đei jơnei, dôm tơdrong jang tim mă ‘lơ̆ng, dôm trong ƀô̆h hơdăh đơ̆ng yan au bơ̆ jang chĕp pơgơ̆r hop akŏm tơlĕch ăn tơdrong jang tơm hăm bơ̆ jang tang găn tŏ ‘mi kial sơnăm 2021. Kiơ̆ kơ ‘nŏh, tơlĕch jang kiơ̆ kơtang rim trong jang tang găn hơlau trŭh tơ jră tang găn păng hơmet pơ ‘lơ̆ng vă pơm dă ƀiơ̆ hiong răm găh bơngai păng mŭk drăm ‘moi kiơ̆ trong jang, tơ iung pơjing tơpôl sơđơ̆ng tơ̆ hơnăp tŏ ‘mi kial pơrăm. Sơnăm 2020, tŏ ‘mi kial pơrăm kơtang lơ̆m tĕh đak bơ̆n. Pơ đĭ lơ̆m tĕh đak hlôi ƀô̆h hơdăh 16 lơ̆m akŏp 22 kơ loăi tŏ ‘mi kial pơrăm. Tŏ ‘mi kial hlôi pơm ăn 357 ‘nu bơngai lôch păng hiong dong hăm akŏp hiong răm găh mŭk drăm vă jê̆ 40.000 ti hlak jên.

Tơblơ̆ nơ̆r: Amazưt