VOV4.Bahnar -  Năr brei, năr 16/4, tơ̆ pơlei tơm Buôn Ma Thuột, dêh char Dak Lăk, Hơnĭh tơm jang Mŭk drăm jang hơdoi păng Atŏk tơ iung tơring tơrang găh Dơnŏ anĭh tơm vei lăng Chŏh jang sa păng Atŏk tơ iung tơring tơrang pơgơ̆r Hop akŏm tơlĕch tơdrong jang sơnăm 2021 hơnĭh jang mŭk drăm jang hơdoi păng atŏk tơ iung tơring tơrang hăm lơ trong jang tơlĕch ăn lơ̆m khei ‘năr đei jĭ hơbŭh Covid-19 tim mă sơđơ̆ng păng rim tơdrong pơkăp mơdro sa hiôk hian đei tơlĕch jang kiơ̆.

Tơroi tơbăt tơ̆ hop akŏm, jô̆ trŭh đĭ khei 3/2021, lơ̆m tĕh đak bơ̆n đei vă jê̆ 17.600 hơp tak xah păng 68 hơp tak xah jang hơdoi iung jang lơ̆m tơdrong jang chŏh jang sa. 83% kơsô̆ hơp tak xah jang sa iŏk đei jơnei, tŏk 50% pơtêng hăm sơnăm 2015. Lơ̆m 1 hơp tak xah jang sa lơ̆m sơnăm iŏk đei hlŏh 380 trĭu hlak jên. Ƀok Trần Thanh Nam, Kơ iĕng Kơcdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang athei rim tơring hơnơ̆ng atŏk tơ iung hơp tak xah, atŏk tơ iung tơmam drăm kiơ̆ trong lơ tơmam drăm, lơ tơdrong jang hăm jang mŭk drăm mơdro sa, tơplĭh ‘nao jang sa pơm tơlĕch, tĕch mơdro, vă ƀrư̆ ƀrư̆ kĕ pơjei kơ tơmam drăm.

Tơblơ̆ nơ̆r: Amazưt