VOV4.Bahnar - Khŭl kơ dră teh đak Indonesia tŏk bŏk hơ tŏk hrĕnh ƀet bơ̆ng vaccine Covid-19 ăn hơ ioh đơ̆ng 12-17 sơ năm lơ̆m khei ‘năr teh đak ‘nâu athei tơ jră hăm ‘măng đei ƀôh kơ tang hloh jô̆ đơ̆ng blŭng pơ yan jĭ păng kơ sô̆ hơ ioh tơ poh jĭ Covid-19 tơ̆ Indonesia lơ hloh apŭng plĕnh teh. Tiến sĩ Aman Pulungan, bơ ngai chĕp kơ̆l Jơ nŭm vei lăng tơ drong jĭ kơ đe hơ ioh Indonesia tơ băt, kơ sô̆ bơ ngai tơ poh jĭ Covid-19 tơ̆ dôm bơ ngai hơ la kơ 18 sơ năm kơ Indonesia hlôi tŏk hloh 2 ‘măng lơ̆m dang tam mă tôm 1 khei. Truh dang ei, tơ̆ Indonesia hlôi đei 26.000 ‘nu hơ ioh tơ poh jĭ Covid-19, lơ̆m noh đei 600 ‘nu mon hlôi lôch. Tiến sĩ Aman akhan, tơ drong tơm pơm ăn ‘noh jĭ yua đơ̆ng kon pơ lei oei ư̆h kơ hlôh vao lơ̆m tơ drong vei lăng hơ ioh, ăn hơ ioh năm jơ̆p tơ ring mă ư̆h kơ gom muh măt. Anih jang dŏng tơ gŭm hơ ioh Indonesia krao hơ vơn khŭl kơ dră teh đak tŭn pran rim tơ drong jang ƀet bơ̆ng păng set hơ len COVID-19, hơ dai hăm ‘noh vei sơ đơ̆ng hơ ioh gơ̆h năm hŏk dơ̆ng mưh tơ drong đei sơ đơ̆ng.

Thuem: Tơ blơ̆