VOV4.Bahnar - Kơ dră teh đak Nguyễn Xuân Phúc hlôi đei iung pơ ma tơ̆ jơ pơ ma dơ nuh atŭm kơ dră kơ pal jăl hop akŏm 76 Jơ nŭm atŭm Liên hợp quốc hăm hơ năn: “ Vang lui kơ jăp păng hơ drin - Yak truh tơ iung ming đơ̆ng rŏng jĭ COVID-19, pơ jing ming dơ̆ng kơ jăp, vei lăng plĕnh teh, pơ trŭt tơ drong pơm tơm kơ kon bơ ngai păng hơ met ming Liên hợp quốc”. Lơ̆m ƀai iung pơ ma đơ̆ng kơ dih, Kơ dră teh đak hlôi tơ roi dôm tơ drong hiong răm ưh kơ kĕ jô̆ pơ tŏ đei lơ̆m jĭ hơ buh COVID-19, pơ ma hơ dăh jĭ hơ buh ‘noh tơ drong tơ roi tơ băt lê̆ hơ drol tĕnh kuăng găh kơ sư̆k phă pơ răm hrưp krĕnh đơ̆ng dôm long nol sơ đơ̆ng ưh tam mă đei ƀôh đơ̆ng sơ̆ nhen jĭ hơ buh dăh mă tơ plih tŏ ‘mi kial tơ dăh ưh kơ đei bơ ngơ̆t truh, hơ met pơ ‘lơ̆ng đơ̆ng hrôih, đơ̆ng hơ tăih. Hăm hơ năp jang đơ̆ng Liên hợp quốc, kơ dră teh đak ‘mĕh vă anih jang âu hơ nơ̆ng sơ kơ̆t hơ dăh hơ năp jang tơm lơ̆m tơ drong jang lơ pang, tŏk bŏk vei lăng đei yua dôm tơ drong hơ drin atŭm tơ jră hăm dôm long nol jơ̆p plei teh roi ‘năr roi kăl mă ưh kơ hơ drô̆ 1 teh đak hơ yơ gơh hơ met pơ ‘lơ̆ng kơ dih. Tơ drong jang kăl hloh dang ei ‘noh jĭ vei lăng jĭ hơ buh COVID-19 lơ̆m jơ̆p plei teh, mă loi ‘noh tơ gŭm hơ drol asong vắc-xin ăn kon pơ lei dôm teh đak đei kơ sô̆ bơ ngai ƀet bơ̆ng oei tŏ sĕt, pơm tơ drong hiôk vă rim teh đak tŏk bŏk pơ drŏng jang hơ dai pơm tơ lĕch păng vang jang pơ truh vắc-xin.

 Thuem: Tơ blơ̆