VOV4.Bahnar - Kơsơ̆ năr 10/12 tơ̆ Hà Nội, Dơnŏ anĭh tơm vei lăng Chŏh jang sa păng Atŏk tơ iung tơring tơrang jang hơdoi hăm “Khŭl jang tơplĭh ‘nao tơchăr chŏh jang sa tih hlŏh lơ̆m plei tĕh” Xi-Gia (CGIAR) vang pơgơ̆r hop akŏm trư̆k tuyên pơma dơnŭh găh atŏk kơtang jang hơdoi lăng trŭh atŏk tơ iung chŏh jang sa kơ jăp ‘lơ̆ng tơ̆ Việt Nam. Iung pơma tơ̆ hop akŏm, Kơ iĕng Kơdră chĕp pơgơ̆r Dơnŏ anĭh tơm vei lăng Chŏh jang sa păng Atŏk tơ iung tơring tơrang Lê Quốc Doanh sơkơ̆t hơdăh, Việt Nam hlôi iŏk đei jơnei tŏk kơtang lơ̆m dôm sơnăm au ki, mă kăl lơ̆m atŏk tơ iung chŏh jang sa. Sơnăm 2020, mă đơ̆ng đei ƀơm răm kơnê̆ đơ̆ng jĭ hơbŭh Covid-19 mă lei tĕch mơdro tơ̆ tĕh đak đe tơmam drăm chŏh jang sa, ‘long, ka hơdang oei iŏk đei trŭh 41 ti dolar Mi. Hơdrô̆ 11 khei au ki, tĕch mơdro tơmam  drăm chŏh jang sa, ‘long, ka hơdang iŏk đei hlŏh 43 ti dolar Mi, tŏk 14% pơtêng hăm sơnăm sơ̆ păng tơchĕng hơlau sơnăm au gô đei lơ hlŏh sơnăm sơ̆. Vă yak trŭh chăl atŏk tơ iung ‘nao hăm lơ tơdrong tơnap tap păng tơdrong lomg, Dơnŏ anĭh tơm vei lăng chŏh jang sa păng atŏk tơ iung tơring tơrang ‘mĕh vă hơnơ̆ng sơng iŏk đei tơdrong tơgŭm djru đơ̆ng rim bơngai tơmơ̆t jên jang, rim khŭl jang apŭng plĕnh tĕh, mă kăl Khŭl jang chă tơchĕng hơlen chŏh jang sa kơ Xi-gia.

Tơblơ̆ nơ̆r: Amazưt