VOV4.Bahnar - Pơgê năr 10/12, tơ̆ Hnam pơgang Ƀô̆ đô̆i 175, Ban Tuyên giáo Trung ương, Báo Điện tử Đảng Cộng sản Việt Nam vang pơgơ̆r Hop akoưm khoa hŏk “30 sơnăm jang hơdoi khŭl jang pơgang ƀô̆ đô̆i kon pơlei tơ̆ đak dơsĭ, achon dơsĭ” vă hơlen hơdăh dôm tơdrong gĭt kăl, tơdrong iŏk đei jơnei kơ tơdrong jang au lơ̆m prăt 30 sơnăm ai ki, hơlen hơdăh păng tơlĕch rim trong jang hle vă atŏk kơtang bơ̆ jang tơdrong au lơ̆m khei năr au kơnh. Hlŏh 30 sơnăm au ki, tơdrong jang au hlôi tơlech jang tôch kơ ‘lơ̆ng lơ̆m bơ̆ jang vei lăng năng tông jơhngơ̆m jăn kon pơlei păng ƀô̆ đô̆i tơ̆ đak dơsĭ, achon dơsĭ; hơmet pơ ‘lơ̆ng tơdrong jang pơgang tơring tơ̆ 972 tơring, lơ̆m au 597 tơring atăih yăih, tơring sơlam tĕh đak, achon dơsĭ. Mă kăl ‘nŏh tơ iung pơjing jơnei 5 tơdrong jang hơdoi ƀar păh Hnam pơgang apŭng hăm khŭl bơ̆ jang pơgang ƀô̆ đô̆ găh Dơnŏ anĭh Ƀô̆ đô̆i apŭng. Hlŏh 40 ƀai chĭh pơma dơnŭh tơ̆ hop akŏm hlôi pơm hơdăh hlŏh dơ̆ng tơdrong gĭt kăl chĭnh trĭ kơ bơ̆ jang hơdoi khŭl jang pơgang ƀô̆ đô̆i kon pơlei tơ̆ đak dơsĭ, achon dơsĭ; sơkơ̆t hơdăh ‘nau jing trong tơlĕch jang tôch trŏ ƀlep đơ̆ng Đảng, Tĕh đak, ư̆h khan lăp tơgop vei lăng năng tông jơhngơ̆m pran jăng grăng akau ăn kon pơlei, ƀô̆ đô̆i mă lei oei pơm gĭt kăl lơ̆m bơ̆ jang pơrô̆ pơrôp, hơmet pơ ‘lơ̆ng trong vei lăng kơ jăp iăp kơtang tĕh đak lơ̆m kon pơlei vă vei lăng năng tông keh kong groi tĕh, tơdrong pơm tơm kơ dĭh kơ tĕh đak.

Tơblơ̆ nơ̆r: Amazưt