VOV4.Bahnar - Hơnĭh tơm jang ƀet pơlong năng găh Dơnŏ anĭh tơm Vệ sinh Dịch tễ Trung ương hlôi jang keh đang ‘măng mă 1 ƀet vaccine pơlong năng Covivac tơ̆ 120 ‘nu bơngai. Kiơ̆ đơ̆ng PGS.TS Vũ Đình Thiểm, Kơdră chĕp pơgơ̆r Hơnĭh tơm ƀet pơlong năng, năr 15/5 au ki, 120 ‘nu bơngai chĭh măt ƀet pơlong năng hlôi ƀet tôm 2 jrŭm vaccine Covivac. Tơchĕng hơlau trŭh năr 29/5, khŭl tơchĕng hơlen gô ƀet iŏk pham khăm hơlen kĕ bơ̆ng lơ̆m 14 năr lăp đơ̆ng rŏng ƀet jrŭm mă 2 kơ 120 ‘nu bơngai. Đơ̆ng rŏng ‘nŏh đĭ đăng dôm pham hơdrol vă ƀet ‘măng mă 1, hơdrol kơ ƀet jrŭm mă 2păng 14 năr lăp đơ̆ng rŏng ƀet jrŭm mă 2 gô đei pơtrŭh ăn tơ̆ Canada vă hơlen lăng tơdrong sĭt kĕ bơ̆ng lơ liơ hăm vaccine, khŭl chă tơchĕng hơlen gô tơroi tơbăt ăn Dơnŏ anĭh tơm vei lăng jang pơgang vă apĭnh pơgơ̆r ƀet ‘măng mă 2. Tơchĕng hơlau ƀet ‘măng mă 2 đei pơgơ̆r lơ̆m khei 7. Covivac ‘nŏh vaccine Covid-19 kơ yuơ Viện Vaccine và Sinh phẩm Y tế (IVAC) chă tơchĕng hơlen, pơm tơlĕch. Dang ei Vaccine hlôi ăn ƀet pơlong năng tơ̆ bơngai jăl mă blŭng tơ̆ Hnam trương Đăi hŏk Y Hà Nội. IVAC iŏk yua kmăi kmŏk pơjing vaccine đơ̆ng kơtăp iĕr, jing kmăi kmŏk pơm tơlĕch vaccine đơ̆ng sơ̆ ki, hlôi đei hơnĭh au iŏk yoa vă pơm tơlĕch vaccine bơ̆ng jĭ hơnơ̆k hơdrap.

Tơblơ̆ nơ̆r: Amazưt