VOV4.Bahnar - Pơm kiơ̆ Tơchơ̆t kơsô̆ 04 năr 19 khei 8 xơnăm 2016 đơ̆ng Anih jang kơpal dêh char Kon Tum jăl 15 găh pơtoi hơtŏk tơ iung hăm dôm tơring tơnap tap lơ̆m khei năr dang ei, đei axong iŏk tơgŭm tơring tơnap tap Văn Lem, apŭng Đăk Tô, 5 xơnăm kơ âu chĕp vei xơnong juăt jang kơ po, Jên mong Vei lăng păng Hơtŏk bri dêh char Kon Tum hlôi đei lơ tơdrong jang kăp gĭt, đei jơnei lơ̆m tơdrong tơgŭm tơring pơkăp tơgŭm chă vei lăng păng hơtŏk bri.

Năr 18/6 âu ki, pơm kiơ̆ Tơdrong jang đơ̆ng Chi ƀô̆ Jên mong Vei lăng păng Hơtŏk bri dêh char Kon Tum găh tơgŭm, iŏk tơgŭm xăh Văn Lem, apŭng Đăk Tô, minh Khul jang kơ Jên mong đei axong jang hadoi hăm Anih jang Đảng, Anih vei lăng kon pơlei xăh pơgơ̆r Tơdrong jang “Têt pơtăm ‘long ƀlŏk hơdơ̆r kơ Ƀok Hô” xơnăm 2021. ‘Năr lêh pơtơm đei pơgơ̆r kăp gĭt tơ̆ Rông hơkŭm kơ pơlei Măng Rương, hăm tơdrong vang akŏm đơ̆ng lơ kon pơlei tơ̆ tơring. Pơmai Y Bé, Ƀĭ thư Chi đoan pơlei Măng Rương ăn tơbăt: “Chơt hơ iă ‘năr âu đei dôm Khul atŭm hăm pơlei pơla, tơring akŏm vă pơtăm ‘long vă ning mônh kơnh kon pơlei ƀôh tơdrong pơyua đơ̆ng pơtăm ‘long. Đei ‘long jơk pơlei pơla đei đak vă xŏ nhă”.

Kơtă ăh Lêh pơtơm “Têt pơtăm ‘long blŏk hơdơ̆r kơ Ƀok Hô” xơnăm 2021, Jên mong Vei lăng păng Hơtŏk bri dêh char Kon Tum hlôi axong ăn Anih jang Đảng, jơnŭm pơgơ̆r tơring păng kon pơlei xăh Văn Lem 300 tơm hơngo 3 hla, hơdrĕch 2 xơnăm vă pơtăm răh rai rok kiơ̆ dôm jăl trong, tăp dăr Rông kơ dôm pơlei pơla vă pơjing um rŭp cham char jơk – rơgoh – ‘lơ̆ng. Rim kang ƀô̆ Khul jang kơ Jên mong duh kơtă pơtho ăn kon pơlei băt găh kih thuơ̆t pơtăm, vei lăng vă tơm hơngo tŏk giơ̆ng ‘lơ̆ng. Ƀok A Hùng, Kơdră Anih vei lăng kon pơlei xăh Văn Lem ăn tơbăt, tơdrong kăp gĭt noh kiơ̆ đơ̆ng dôm tơdrong jang thoi âu, tơdrong hlôh vao đơ̆ng kon pơlei lơ̆m xăh găh pơtăm ‘long, pơjing bri păng vei lăng bri roi năr roi đei hơtŏk: “Lơ̆m khei năr âu ki truh kơ dang ei, kon pơlei lơ̆m tơring Văn Lem tơrĕk tơnăp hăm tơdrong jang vei lăng bri. Xơnong jang tơnăp, kơdih hơmet gre vih vơ̆t, kơchăng hăm rim tơdrong jang đei tơrĕk truh vei lăng bri. Hơnơ̆ng chă hơlen băt hơdăh tơdrong đei ƀôh lơ̆m tơring bri mă po vei hơlen. Mă kăl dang ei đei tơchơ̆t jang đơ̆ng dêh char, apŭng găh pơtăm ‘long lơ̆m tơring Văn Lem noh jăh vă akhan âu jing xơnong jang kăp gĭt hloh găh pơtăm bri tơ̆ groi teh phui phang tơnang kŏ lơ̆m tơring Văn Lem. Kon pơlei duh nhen đoan viên hơdruh tơdăm tơ̆ dôm pơlei pơla tơnăp hăm tơdrong vei lăng bri duh nhen vang chă pơtăm bri”.

Iŏk tơgŭm xăh Văn Lem lơ̆m tơdrong juăt jang, jing pơm kiơ̆ pơkăp kla jên vei lăng bri, rim xơnăm Jên mong Vei lăng păng Hơtŏk bri dêh char Kon Tum adoi axong Khul pơm jang yuơ Kơdră Jên mong chĕp kơ̆l Khul chă pơtho ăn jơnŭm pơgơ̆r xăh hơlen tơdrong chih akŏm, kĭ pơkăp jên axong jang vă kla jên vei lăng bri; vei lăng păng iŏk yua, pơkăp kla jên vei lăng bri; chih akŏm hla bar pơkăp găh vei lăng bri ăn unh hnam, tơ ‘ngla bơngai jang, pơlei pơla. Ƀok Hồ Thanh Hoàng, Kơdră Jên mong Vei lăng păng Hơtŏk bri dêh char Kon Tum ăn tơbăt, đơ̆ng tơdrong tơgŭm găh tơdrong juăt jang đơ̆ng Anih mong jên, tơdrong jang vei lăng bri lơ̆m tơring iŏk tơgŭm đei jang tơnăp hloh. Kon pơlei băt hơdăh tơdrong kăp gĭt păng pơyua đơ̆ng tơdrong vei lăng păng hơtŏk bri: “Kon pơlei hlôi tơplih đon kơchĕng. Adrol ki kon pơlei vei lăng bri tam mă tơnăp. Dang ei kon pơlei vei lăng bri kơjăp bơih. Kơlih kon pơlei băt hơdăh vei lăng bri jing tơdrong jang đei jên. Vei lăng bri jing trong ‘lơ̆ng hloh vă đei iŏk jên kla kơyu vei lăng bri kơjăp hloh. Đơ̆ng jên kla kơyuơ vei lăng bri hlôi tơgop pơm hơtŏk tơdrong erih kon pơlei”.

Adoi đơ̆ng tơdrong pơtho, tơroi găh kih thuơ̆t đơ̆ng Jên mong Vei lăng păng Hơtŏk bri dêh char Kon Tum, kon pơlei tơ̆ 4 thôn kơ tơring Văn Lem, apŭng Đăk Tô hlôi tơlĕch jang kiơ̆ Pơkăp tơgŭm pơtăm bri tơ̆ tơring teh kông phui phang tơnang kŏ kơ xăh hăm hơgăt xă truh 123 ha đơ̆ng jên mong kla ăn tơdrong vei lăng bri kơ tơring. Trong pơkăp jang âu tơgŭm răh kon pơlei xăh Văn Lem đei tơdrong jang, hơtŏk iŏk yua, tơgop xut lê̆ pơngot tơjur hin dơnuh, tơgop răh tơdrong pơm jang đei jơnei tơchơ̆t pơtăm ‘nao 15.000ha bri mă Tơchơ̆t Hop akŏm Đảng ƀô̆ dêh char Kon Tum ‘măng mă 16 tơlĕch. Chơt hơ iă hloh dơ̆ng noh atŭm hăm pơtăm bri, dang ei pơđĭ 4 pơlei pơla kơ tơring Văn Lem adoi iŏk pơkă vei lăng đơ̆ng hơgăt 5.000ha bri kơyuơ xăh vei lăng. Kơsô̆ jên kla ăn tơdrong vei lăng bri mă rim pơlei đei iŏk rim xơnăm tơgŭm ăn kon pơlei hơtŏk tơdrong jang xa păng pơtoi đei lơ tơdrong jang kăp gĭt vă tơpôl roi năr roi hơtŏk tơ iung.

Lan chih păng pơre nơ̆r