VOV4.Bahnar - Hơ nơ̆ng bơ̆ jang lơ̆m hop akŏm mă 3, Jơ nŭm pơ gơ̆r kon pơ lei dêh char Dak Lak jăl X, ‘năr (9/12) dôm bơ ngai tang măt pơ ma nuh găh dôm hla ar chih tơ roi đei ƀơm truh tơ drong jang atŏk tơ iung mŭk drăm, tơ pôl kơ dêh char sơ năm 2022 păng đơ̆ng 2020 -2025. Dôm tơ drong đei ƀơm truh tơ dỏng sơng iŏk jên jang, chă tơ drong jang ăn bơ ngai ƀơm ưh ‘lơ̆ng đơ̆ng jĭ Covid 19 đei dôm bơ ngai tang măt tôch tơ rĕk.

Dôm bơ ngai tang măt hơ len năng Hla ar chih tơ roi ƀơm truh tơ drong jang atŏk tơ iung mŭk drăm, tơ pôl kơ dêh char Dak Lak sơ  năm  2022

Sơ năm 2021, tơ drong jang tŏk mŭk drăm kơ dêh char Dak Lak đei 5,1%, pơ hlom năng sơ năm 2022 adrin iŏk đei 7,27%, kiơ̆ dôm bơ ngai tang măt, vă jang đei tơ drong ‘nâu lơ̆m khei ‘năr jĭ hơ buh oei tôch hơ mơt ‘nŏh, Dơ nŏ anih vei lăng kon pơ lei dêh char athei akŏm jơ hngâm hơ met pơ ‘lơ̆ng dôm tơ drong oei tơ hlăk găh tơ drong sơng iŏk jên tơ mât jang. Mă loi ‘nŏh tơ hlăk găh trong iŏk yoa tĕh păng tơ drong hrŭ ‘mong mưh chưk pơ ‘ngoăih tĕh. Kŭm hăm sơng iŏk jên jang, tơ drong chă tơ drong jang ăn kon pơ lei đei tơ rĕk truh ‘năi.

Kiơ̆ hla ar chih tơ roi đơ̆ng Anih vei lăng tơ drong jang xa, linh jĭ rơ ka păng tơ pôl Dak Lak, lơ̆m ‘măng jĭ Covid 19 tơ pŏh mă 4, đei vă jê̆ 140.000 ‘nu bơ ngai đơ̆ng dôm dêh char găh Pơ băh vih. Lơ̆m nŏh đei vă jê̆ 24% ‘nu bơ ngai ‘mĕh oei dơ̆ng tơ̆ tơ ring vă jang xa păng hơ pơi ‘mĕh đei tŏk iŏk jên đơ̆ng 20 - 80 triu vă jang xa. Yoa thoi nŏh, bơ ngai tang măt athei dêh char đei trong tơ gŭm găh tŏk iŏk jên hăm jên kon tŏ sĕt ăn kơ sô̆ bơ ngai jang oei dơ̆ng tơ̆ tơ ring.

Dơ̆ng: Tơ blơ̆