VOV4.Bahnar - Lơ̆m dôm năr lơ̆m tĕh đak tơbăt 76 sơnăm Kĕch mang Khei Tơhngam păng Quốc khánh năr 2/9, tơdrong jĭ hơbŭh Covid-19 oei hơnơ̆ng pơrăm kơtang đĕch. Chơt hơ iă lơ̆m năr lêh gĭt kăl kơ tĕh đak, mă lei kon pơlei Tây Nguyên jei atŏk kơtang jơhngơ̆m đon kơchăng lơ̆m tang găn jĭ. Tơbăt găh tơdrong au, ƀok Y Trơp (hơdrung Mnông) oei tơ̆ bon Jâng Plây, tơring Trường Xuân, apŭng Đak Song, dêh char Dak Nông pơma:“Têt Tĕh đak pơm tơm kơ dĭh kơ Tĕh đak, năr lê̆h tĭh kơ Tĕh đak, kon pơlei nhôn tôch chơt hơ iă mư̆h tĕh đak roi năr roi atŏk tơ iung, tơdrong erĭh sa kon pơlei roi năr roi hiôk jơnap. Mă lei kơ yuơ jĭ hơbŭh Covid-19 pơrăm pơm ăn mŭk drăm-tơpôl đei ƀơm kơnê̆. Mă kăl ‘nŏh tơdrong erĭh sa kơ kon pơlei rim dêh char đei jĭ hơbŭh pơrăm. Vă vei lăng năng tông kơ dĭh, ŭnh hnam păng pơlei pơla, kon pơlei lơ̆m pơlei jei jang kiơ̆ kơtang tơdrong pơkăp 5K đơ̆ng Dơnŏ anĭh tơm vei lăng jang pơgang, atŏk kơtang jơhngơ̆m đon kơchăng iung jang. Mư̆h ƀô̆h tơmoi, bơngai, kon pơlei brŏk đơ̆ng tơring jĭ ‘nŏh tơroi tơbăt ăn khŭl kơdră bơ̆ jang hloi. Kiơ̆ yok rok jơ̆ng jơhngơ̆m đon ‘mêm kơ eng tĕh đak, kon pơlei chă pơrô̆ hơvơn dĭh băl tơra tơgop bơ̆n ‘nhot sa, ƀum, plei ‘long pơtrŭh tơgŭm ăn rim dêh char Bình Dương, Đồng Nai, pơlei tơm Hồ Chí Minh hăm hơpơi ‘mĕh vă vang chă hơlêm dih băl lơ̆m jơ ‘năr tơnap tap păng pơrang jĭ hrôih pă đei, rim răih bơngai vĭh hơlơ̆k erĭh sa hiôk hian dơ̆ng”.

 2. Vă tang găn jĭ hơbŭh Covid-19, dêh char Kon Tum hlôi pơjing hlŏh 2.800 Khŭl bơ̆ jang lơ̆m pơlei pơla. Tơ̆ tơring tơnap tap hlŏh Đak Pxi, apŭng Đak Ha, yă Y Dim, Kơ iĕng Kơdră chĕp pơgơ̆r Đảng tơring tơbăt:“Khei năr au ki, Dơnŏ anĭh Đảng păng Khŭl kơdră chĕp pơgơ̆r tơring hlôi đei hop akŏm păng tơroi tơbăt ăn đĭ đăng kon pơlei hlô̆h vao tơdrong hli hlơt, hơmơt tơt đơ̆ng jĭ hơbŭh Covid-19. Kiơ̆ kơ ‘nŏh, pơtho tơbăt ăn kon pơlei băt vă pơm kiơ̆ trong tang găn jĭ hơbŭh đei jơnei. Kang ƀô̆ hop akŏm kon pơlei, pơlei pơjao khŭl jang tơroi tơbăt ăn kon pơlei găh bơ̆ jang tang găn jĭ hơbŭh Covid-19. Nhôn hơnơ̆ng chă pơtho khan ăn kon pơlei tơdăh đei tơdrong gĭt ‘mĕh vă lĕch tơ̆ ‘ngoăih ‘nŏh gop ƀŏ, ôp ti hăm đak pơgang, mă kăl đơ̆ng rŏng tơƀơ̆p bơngai nai vă vĕh ver tơpŏh jĭ. Nhôn hơnơ̆ng tơroi tơbăt, athei kon pơlei ‘nĕ akŏm lơ bơngai, ư̆h kơ gơ̆h pơgơ̆r et sa au to...”.

            - Tơring Dă Sar, apŭng Lạc Dương, dêh char Lâm Đồngtŏk bŏk jing tơring sơđơ̆ng, tim mă đei ƀô̆h bơngai ayơ tơpŏh jĭ Covid-19, mă lei jơhngơ̆m đon kơchăng tang găn jĭ ling lang đei atŏk kơtang. Ƀok Liêng Jrang Ha Rô Ky, Kơdră chĕp pơgơ̆r Dơnŏ anĭh vei lăng kon pơlei tơring Dạ Sar tơbăt, mă đơ̆ng tơdrong erĭh sa kơ kon pơlei oei tơnap tap, mă lei kon pơlei hlôi vang chă tơra tơgop tơmam drăm nhen bơ̆n ‘nhot, ƀum, plei ‘long đơ̆ng kơ dĭh jang sa đei vă tơgŭm ăn tơring pơvang tang găn. “Jang kiơ̆ nơ̆r pơrô̆ jang đơ̆ng dêh char Lâm Đồng adoi nhen apŭng Lạc Dương găh bơ̆ jang tang găn jĭ hơbŭh, kang ƀô̆ kon pơlei rim hơdrung tơring Dạ Sar nhôn mĭnh jơhngơ̆m đon jang kiơ̆ rim trong jang tang găn jĭ adoi nhen oei hơtăih dĭh băl. Lơ̆m mĭnh ƀar giĕng kơ au, nhôn hlôi pơjing hơnĭh gak vă vei lăng tơring sơđơ̆ng, tang găn rim tơmoi yak trong au vă tang găn jĭ. ‘Ngoăih vang jang gak tơ̆ hơnĭh gak, kon pơlei kon pơlei tơring nhôn gô mơ̆ng ŭnh hnam đei ƀô̆h lơ liơ bu đei phe tơra ăn phe, bu đei ‘nhot tơgŭm ăn ‘nhot vang tơgŭm djru ăn tơring đei jĭ hơbŭh pơrăm tŏk bŏk pơm kiơ̆ oei hơtăih dĭh băl kiơ̆ nơ̆r athei jang kiơ̆ 16 đơ̆ng Thủ tướng Tĕh đak”.

       - Lui kiơ̆ lơ̆m tơdrong chĕp pơgơ̆r đơ̆ng Đảng păng Tĕh đak lơ̆m tang găn jĭ hơbŭh Covid-19 hăm trong jang “Tang găn jĭ nhen tang găn ayăt”, yă Rmah Chứt (bơngai Bahnar) oei tơ̆ pơlei Thong A, tơring Ia Hrú, apŭng Chư Pưh, dêh char Gia Lai tơbăt:“ Mư̆h đei jĭ hơbŭh kon pơlei bơ̆n pơm kiơ̆ ‘lơ̆ng vă tang găn jĭ, kon pơlei pơm kiơ̆ tơdrong pơkăp 5k. Kơdră tơring, pơlei jei hơnơ̆ng chă pơtho khan ăn kon pơlei găh tơdrong tang găn jĭ. Kon pơlei hơpơi tơdrong jĭ jăn au dăh đĭ, kon pơlei đei jang sa hiôk hian dơ̆ng. Pơi ‘mĕh vă pơ đĭ hơdrĕch hơdung mĭnh jơhngơ̆m đon tơpŭh hŭt jĭ au. Păng hơpơi ăn rim răih bơngai pran jăng grăng akau”.

Tơblơ̆ nơ̆r: Amazưt