Pơđĭ 2 'nu hơioh đei kŏ, meo kăp, kach ngăl mă lei ưh kơ đei ƀet vaccine tang găn jĭ vơnh. Bơngai mă mĭnh 'noh, mon drŏ nglo K.S. (6 sơnăm), oei tơ̆ plei Đoàn Kết Ó-Kly, xăh Ia Tôr, dêh char Gia Lai. Bơngai mă ƀar 'noh mon drŏ kăn K.P.T (4 sơnăm), oei tơ̆ plei Ia Kênh, xăh Gào lôch hăm dôm tơdrong đei ƀôh jĭ vơnh ‘năi.

Thoi noh, đơ̆ng blŭng sơnăm 2026 truh dang ei, Gia Lai hlôi đei 5 'nu bơngai lôch yua đơ̆ng jĭ vơnh. Anih jang pơgang Gia Lai tơtă, mưh đei kŏ, meo kăp, kach dăh mă liăh tơ̆ hơkar đei rơka jĭ, kon pơlei athei ôp rơka hăm đak pơgang, pơlôch pơrang jĭ păng jăh năm hloi tơ̆ anih jang pơgang vă đei nơ̆r roi tơƀôh, ƀet vaccine, pơgang pham vă tang găn jĭ vơnh mưh đei nơ̆r athei.