Kiơ̆ kơ ‘noh, dêh char Gia Lai tơgŭm hơdrol tơmơ̆t jên jang ming man, pơm hơmet păng răt tơmam drăm kơmăy kơmŏk ăn kơ  24 hnam pơgang xăh găh tơring sơlam, tơring mơmat tat. Dôm tơdrong jang ‘noh đei pơih să hnam bơ̆jang, man ‘nao hơnih hơlen lăng um rup, hơlen lăng bơ̆n pham, siêu âm, kơ̆p kư̆p blŭng a, hơnih hơmet rơgoh đak ‘mê̆ ‘mach pơgang păng dôm hơnih nai hai. Akŏm jên tơchĕng hơdrol ăn tơdrong jang ‘nâu dang 288 ti hlak jên. 

Kŭm hăm tơmơ̆t jên jang pơm anih jang tơmam drăm, dêh char Gia Lai kŭm tơlĕch trong jang tơgŭm khăm hơlen jơhngơ̆m pran rim khei ưh kơ iŏk jên hăm kon pơlei tơ̆ 12 xăh sơlam, achon kông tơ̆ đak dơsĭ păng tơring mơmat tat. Bơngai đei khăm 'noh jĭ bơngai kon kông, bơngai kră, bơngai đei kŏng, bơngai đei tơdrong hơrih sa mơmat tat, ŭnh hnam dơnuh hin, vă jê̆ dơnuh hin, drŏ kăn lơ̆m sơnăm rơneh kon păng hơioh hơla kơ 6 sơnăm. Tơdrong khăm hơlen jơhngơ̆m pran gô tơklep hăm pơjing hla ar chih răk jơhngơ̆m pran điện tử, roi tơƀôh, chă ƀôh hrôih tơdrong jĭ jăn păng ăn năm hơmet tơ̆ hnam pơgang kơpal mưh kăl.

Hơdai hăm ‘noh, Jơnŭm pơgơ̆r kon pơlei dêh char Gia Lai kŭm tŏk bŏk pơjing tơdrong tơchơ̆t 'nao găh trong jang tơgŭm sơng đei păng tơgŭm lơ hăm ƀak si, dược sĩ lơ̆m tơring. Trong jang âu lăng truh khul jang pơgang bơ̆jang tơ̆ dôm hnam pơgang, hơnih jang pơgang tơring kon pơlei kon kông, groi kông, tơring sơlam, tơring achon dơsĭ păng rim anih jang pơgang kơ teh đak nai kơ dêh char.

Hơdrol kơ đei tơdrong jang tơgŭm 'nao, dêh char bơ̆jang kiơ̆ trong jang tơlĕch jang ăn ƀak si năm jang tơ̆ xăh. Yă Nguyễn Thị Thanh Lịch, Phŏ Kơdră Anih vei lăng kon pơlei dêh char Gia Lai tơbăt:

"Dêh char tơlĕch ăn lơ tơdrong jang tơgŭm găh hơvơn jang đei mă lei ƀak si năm bơ̆jang tôch kơ tŏ sĕt. Hrei ‘nâu, kơsô̆ hơvơn đei bơngai jang lơ hloh đơ̆ng nhôn ‘noh 600 triê̆u hlak jên ăn minh ƀak si păng tơgŭm jên thuê hnam. Nhôn hlôi pơjing trong tơlĕch jang vă pơtruh, ăn, pơlơh băl ƀak si jur tơ̆ xăh."

Dang ei jơ̆p lơ̆m dêh char Gia Lai đei 135 hnam pơgang xăh hăm 369 anih jang, pơvih pơvăn ăn kơsô̆ kon pơlei hloh 26.800 'nu bơngai lơ̆m 1 hnam pơgang. Mă lei, bơngai jang ƀak si klăh asong tam mă hơtŏ băl. Dêh char oei 76 anih jang pơgang xăh tam mă đei ƀak si bơ̆jang. Kiơ̆ trong tơlĕch jang, lơ̆m sơnăm 'nâu dêh char Gia Lai tơplih băl 38 'nu ƀak si đơ̆ng dôm hnam pơgang, anih jang pơgang păng anih khăm hơmet jĭ kơ teh đak năm tơgŭm ăn 30 xăh, phường đei 'mĕh vă tơgŭm hơdrol.

Trong tơlĕch jang atŏk kơtang ƀok thây pơgang năm jang tơ̆ tơring kơ dêh char Gia Lai bơ̆jang kiơ̆ đơ̆ng sơnăm 2026 truh sơnăm 2030. Khei 'năr rim ƀak si năm bơ̆ jang tơ̆ xăh tŏ sĕt hlŏh 'nŏh 6 khei păng lơ hlŏh 'nŏh 12 khei, gơ̆h bơ̆ jang kiơ̆ lơ 'măng mă lei athei vei sơđơ̆ng khei 'năr kiơ̆ tơdrong hơgăt. Kiơ̆ đơ̆ng pơtôch tơlĕch jang păng tơdrong rơih iŏk bơngai jang pơgang, Anih vei lăng jang pơgang dêh char Gia Lai gô jang tơgŭm ăn Anih vei lăng kon pơlei dêh char Gia Lai tơchơ̆t kơsô̆ ƀak si păng tơring hơnơ̆ng đei tơgŭm lơ̆m dôm sơnăm đơ̆ng rŏng dơ̆ng.