Tơ̆ hơnăp hơmơt kơ jĭ vơnh hơnơ̆ng đei ƀôh, Anih vei lăng jang pơgang dêh char Lâm Đồng athei Anih vei lăng tơdrong jĭ jăn dêh char hơtŏk loi dơ̆ng dăr hơlen, kơchăng chă ƀôh dôm tơdrong ưh kơ ê ƀơm truh jĭ vơnh, mă loi 'noh jĭ kŏ, meo jâu đei jĭ; kŏ kăp lơ bơngai; kon tơrong jĭ, lôch ưh kơ băt yua đơ̆ng kiơ păng bơngai đei kŏ, meo kăp, kach hơmơt kơ ƀơm jĭ.

Dôm anih jang pơgang đei athei jang hơdai kơjăp hăm anih jang thú y păng khŭl kơdră tơring vă dăr hơlen, băt hơdăh dôm bơngai đei ƀơm jĭ vơnh tơ̆ kon tơrong; hơdai hăm 'noh tŭn pran tơdrong jang roi tơbăt tơ̆ tơpôl, hnam trưng hŏk păng dôm tơring đei hơmơt lơ. Anih jang pơgang Lâm Đồng tơtă, mưh đei kŏ, meo kăp dăh mă kach, kon pơlei kăl kơ ôp rơka hăm đak pơgang păng đak rơgoh, đơ̆ng rŏng kơ 'noh năm tơ̆ anih jang pơgang vă đei pơtho, hơmet păng ƀet vaccine tang găn jĭ vơnh tơtom.