Lêh akŏm Sầu riêng Đăk Lăk sơnăm 2026 gô pơgơ̆r đơ̆ng năr 15/8 truh năr 2/9, hăm pơhlom 1.000 'nu tang măt kơ dôm dêh char, pơlei tơm, rim hơnih jang tơm, hơnih jang Trung ương păng hloh 400 'nu tang măt đơ̆ng apŭng plenh teh. Atŭm hăm khul tơmoi, Lêh akŏm gô hơvơn đei đơ̆ng 25.000 - 30.000 'nu tơmoi lơ̆m păng 'nguaih kơ teh đak truh akŏm.

 Vă vei sơđơ̆ng 'lơ̆ng ăn tơmam xa ah lêh akŏm, hơnih jang pơgang hơmet Jĭ jăn Đăk Lăk chih akŏm tơdrong jang, pơtơm tơ̆ dôm tơring pơgơ̆r lêh akŏm; atŭm hăm noh hơlen lăng dôm hơnih oei xa, nha hang, khăch sạn gah tơdrong jang tang găn păng pĭt unh xa păng vei rơgoh tơmam drăm xa.

Hơnih jang pơgang hơmet jĭ jăn Đăk Lăk adoi hơtŏk kơtang tơroi tơbăt ăn kon pơlei, bơngai pơtăm sâu riêng hăm rim hơnih tĕch răt pơm kiơ̆ kơjăp dôm tơchơ̆t gah vei rơgoh tơmam drăm xa hơdrol, lơ̆m păng đơ̆ng rŏng kơ lêh. Ƀok Trần Quang Hưng, Phŏ Kơdră Hơnih jang Vei rơgoh tơmam drăm xa, kơ Hơnih jang pơgang hơmet jĭ jăn Đăk Lăk ăn tơbăt:  “Hơnih jang pơgang dêh char Đăk Lăk hlôi akŏm đei 2 khŭl jang dăr hơlen. Minh khŭl chă dăr lăng tơ̆ hơnih tĕch tơmam et nhă ăn tơmoi lơ̆m dôm năr lêh; khŭl nai noh dăr lăng tơ̆ dôm khăch sạn, nhà hàng, chă pơtho pơm kiơ̆ dôm tơchơ̆t pơvih pơvăn yua Hơnih vei lăng kon pơlei dêh char tơlĕch jang, vă pơvih ăn khŭl kơdră kơpal. Atŭm hăm noh, rim khŭl jang kơ Hơnih jang pơgang adoi chă dăr lăng tơ̆ dôm Hơnih akŏm 'măn tơmam pai xa, hơnih pơdah tơmam drăm vă vei rơgoh 'lơ̆ng hăm tơmam drăm xa”