Ƀok Y Tong Bkrông, 47 sơơnăm, bơngai Ê Đê, tơ̆ xăh Ea Na, truh tơ̆ Anih jang pơgang Krông Ana vă khăm hơlen jơhngơ̆m pran. Tơ̆ Kiosk kơmăy kơdâu, ƀok đei pơtho chih tơmơ̆t kơsô̆ chih măt khăm, chă hơlen kơtơ̆ng ang păng iŏk kơsô̆ tơrih lăp lơ̆m 2,3 pơnĭt đĕch. Đơ̆ng kơplăh chih măt truh ƀơ̆t đei khăm hiong tam mă truh 20 pơnĭt. Ƀok Y Tong tơbăt:

“Năm khăm tơ̆ âu dang ei ĭnh ƀôh tôch kơ hiôk. Sơ̆, năm khăm athei hơmet ăn lơ tơdrong, mă lei dang ei lăp kăl kăn kươk kon pơlei, kơtĭt mã đang kơ 'noh tơmơ̆t lơ̆m kơmăy chih răk 'noh đang bơih. Tôch kơ hiôk. 'Nâu jĭ tơdrong đei yua đơ̆ng tơplih kơsô̆ lơ̆m tơdrong jang pơgang păng dôm tơdrong hơrih sa kơ kon pơlei lơ̆m teh đak.”

Ưh khan lăp tơlĕch jang hơnih Kiosk gơh hơgei, Anih jang pơgang Krông Ana hlôi tơmơ̆t yua kơmăy kơmŏk kơsô̆ đơ̆ng khei 9/2025, ƀrư̆ ƀrư̆ tơplih kơsô̆ hla ar hô sơ. Kơmăy vei lăng tôm tơdrong đơ̆ng bơ̆jang, tơdrong khăm hơmet jĭ, hơlen lăng, um rup truh hla ar pơgang păng tơdrong hơmet jĭ. Bơngai jĭ gơh chih măt khăm hăm kăn kươk kon pơlei, VNeID dăh mă VssID, tơgŭm tơ jur ƀiơ̆ pơm hla ar, tơ jur ƀiơ̆ jơ năr gô păng hơtŏk 'lơ̆ng đei yua vei lăng. Ƀak si Hồ Văn Lập, Phŏ Kơdră vei lăng Anih jang pơgang Krông Ana tơbăt, anih jang tŏk bŏk tơplih kơsô̆ kiơ̆ trong jang đơ̆ng Anih tơm vei lăng găh jang pơgang păng tơchĕng hơdrol gô jang đang lơ̆m khei 11/2026.

“Lơ̆m tơdrong mơmat tat, anih jang hlôi iŏk yua tơpôl vang jang păng đei tơgŭm minh jrăng Kiosk hơgei, kiơ̆ đơ̆ng noh gơh iŏk yua hla ar chih tơdrong jĭ lơ̆m điên tư vă tơplih kơsô̆. Kiơ̆ trong jang truh khei 11/2026 đơ̆ng Anih tơm vei lăng găh tơdrong jang pơgang, Anih jang gô hơmet tôm lê̆ đĭ hla ar chih tơdrong jĭ hăm hla ar joăt joe hơdrol ki”.

Kŭm nhen tơ̆ grŭp jang pơgang teh đak, tơplih hăm kơmăy sô̆ tŏk bŏk đei hơtŏk pran tơ̆ grŭp jang pơgang kơdih dêh char Đắk Lắk. Nhen Hnam pơgang Đại học Y dược Buôn Ma Thuột, hlôi tơlĕch jang 100% kơmăy Kiosk chih măt khăm, kơmăy kơmŏk ăn anih jang pơgang, tơgoăt hơdai đơ̆ng dôm khoa, lăm, tơgŭm chih răk, pơtruh păng roi tơƀôh um rup hơlen lăng tơdrong jĭ. Hơdai hăm ‘noh, kơmăy nội soi đei tơmơ̆t AI păng lăm hơlen lăng đei kơmăy kơdâu kơdih, tơgop hơtŏk 'lơ̆ng păng đei yua khăm hơmet jĭ. Ƀak si Võ Minh Thành, Kơdră chĕp kơ̆l Hnam pơgang tơbăt, hăm tơdrong tơplih kơsô̆ jrŭ să, ưh khan lăp tơdrong sơng iŏk păng hơmet jĭ đei pơgơ̆r 'lơ̆ng hơ iă, mă bơngai jĭ kŭm ƀônh chă lăng hơlen tơdrong jơhngơ̆m jăn kơdih.

“Pơtôch 'măng khăm, hơmet jĭ, bơngai jĭ đei asong mĭnh mã QR đei tơmơ̆t hơdai trong link, păng mưh pơih, mơ̆t lăng gô lĕch đei trang tơmơ̆t hơdai đĭ đăng tơdrong hơlen lăng, hơlen lăng rup đơ̆ng CT, MRI păng gơh tăh lơ̆m kơmăy dăh mă điên thoăi kơdih. Tôch kơ hiôk yua kơ bơngai jĭ ưh kơ kăl chĕp ba tơmam kiơ nhen hơdrol sơ̆."

Kiơ̆ kơsô̆ chih jô̆ đơ̆ng Anih vei lăng jang pơgang dêh char Đắk Lắk, 100% anih khăm, hơmet jĭ lơ̆m dêh char hlôi iŏk yoa Kăn kươk kon pơlei, Kăn kươk kon pơlei điên tư (VneID) păng ƀao hiêm tơpôl điên tư (VssID) vă chă hơlen lăng tơdrong khăm, hơmet jĭ, tơplih the ƀao hiêm pơgang hla ar; hơdai hăm 'nŏh tơlĕch jang kla jên ưh đei iŏk yoa jên măt. Hlŏh 771.000 'nu kon pơlei hlôi đei hla ar vei lăng jơhngơ̆m pran điện tử. Lơ anih jang hlôi tơlĕch jang hla ar hơmet jĭ điện tử, lơ̆m noh 8 anih jang tơplih ăn hla ar hơmet jĭ hla ar ngăl bơih. Ƀok Phạm Minh Hữu, Phŏ Kơdră chĕp kơ̆l Anĭh vei lăng jang pơgang dêh char Đăk Lăk, tơbăt kiơ̆ trong jang đơ̆ng Anĭh tơm vei lăng jang pơgang, trŭh đĭ khei 11/2026, đĭ đăng anĭh jang pơgang tơ̆ Đăk Lăk athei tơlĕch jang chĭh măt khăm hăm Kiosk, iŏk yua hla ar chih tơdrong jĭ điên tư tơplĭh ăn hô sơ hla ar păng tơmơ̆t hơdai lơ̆m kơmăy chih răk kon pơlei khăm hơmet jĭ.

“Nhôn tŏk bŏk pơgơ̆r hơlen lăng dơ̆ng đĭ đăng dôm hnam pơgang găh kơmăy kơmŏk kơtơ̆ng ang, trong pơtruh vă băt hơdăh hô sơ jơhngơ̆m pran điện tử kơ kon pơlei. Dang ei 12 kơmăy chih răk găh kon pơlei đei ƀơm truh pơgang tŏk bŏk đei hơdrin tơlĕch jang lơ̆m tơdrong jang 90 năr kiơ̆ nơ̆r athei đơ̆ng Anih tơm vei lăng jang pơgang păng gô đang tơ̆ hơnăp kơnh. Kiơ̆ đơ̆ng noh, đei tôm kơsô̆ chih răk găh kon pơlei hơmet jĭ kơ dêh char  Đắk Lắk.”

Tơplih kơsô̆ kiơ̆ Tơdrong tơchơ̆t 57 đơ̆ng Anih tơm Chĭnh trĭ tŏk bŏk ƀrư̆ ƀrư̆ tơplih trong bơ̆ jang đơ̆ng Anih jang pơgang Đăk Lăk, đơ̆ng chih măt khăm, vei lăng hla ar hô sơ, hơlen lăng jĭ truh kla jên hơmet jĭ. Tơdrong akŏm chih răk lơ̆m kơmăy kơsô̆ păng tŭn pran iŏk yua kơmăy kơmŏk ưh khan lăp hơtŏk 'lơ̆ng tơdrong vei lăng, mă gĭt kăl hloh 'noh jĭ pơm kơđeh jơ năr, tơ jur pơm hla ar păng pơm ƀônh hiôk ăn bơngai jĭ. 'Nâu kŭm jing tơdrong 'lơ̆ng vă Anih jang pơgang Đăk Lăk hơnơ̆ng pơjing anih jang pơgang 'nao, iŏk kon pơlei pơm tơm pơvih pơvăn.