Đơ̆ng sơnăm 2022 truh dang ei, lơm teh đak đei hloh 90.000 ‘nu bơngai răk kŏ, meo kăp, kach, lơ̆m ou 365 ‘nu bơngai lôch. Kon jên ăn ƀet bơ̆ng păng ming hơmet ăn bơngai răm kŏ, meo kăp đei truh vă jê̆ 1.000 ti hlak jên. Hơdrô̆ tơ̆ Đắk Lắk, jăl jang ou đei kơhrĕng ‘nu bơngai răm kŏ, meo kăp, lơ̆m ou đei 7 ‘nu bơngai lôch.

Tơ̆ Hop akŏm, rim bơngai tang măt hơlen, oei đei lơ tơdrong tơnap tap lơ̆m vei lăng tơpôl kŏ, meo, ƀet pơgang vaccine păng dăr kăng, hơmet đei jou đei tơpoh jĭ. Lơ nơ̆r tơgop akhan bơ̆ jang tang găn jĭ kŏ vơnh tim đei lăng kơjăp; bơ̆ jang vei lăng kŏ meo oei tim mă ‘lơ̆ng.

Jăl jang 2026-2030, rim bơngai tang măt drơ̆ng mĭnh nơ̆r kăl atŏk kơtang pơrô̆ pơrôp, pơtho tơbăt ăn kon pơlei, mă kăl hơmet ƀlep trong mưh kŏ, meo kăp, kach păng năm truh tơ̆ hnam pơgang ƀet vaccine tơtom. Bơ̆ jang tang găn hơlou, iung tơjră tang găn Jĭ kŏ vơnh đei tơlĕch jang hơnơ̆ng, hăm vang iung jang kơjăp ƀar păh hơnih jang pơgang, hơnih jang pơgang vei lăng kon tơrong, khul kơdră tơring păng kon pơlei, lăng truh trong tơlĕch ăn ưh kơ đei bơngai lôch kơ yuơ jĭ kŏ vơnh lơ̆m sơnăm 2030. Ƀok Võ Hải Sơn, Kơ iĕng Kơdră Hơnih Tang găn hơlou jĭ jăn găh Hơnih tơm vei lăng jang pơgang tơbăt.“Bơ̆n tơbăt ăn kon pơlei lơ lou, tơdăh dôm bơngai ưh kơ pŭn ai răm kơ kŏ, meo kăp ‘noh dăh năm tơ̆ hnam pơgang hloi vă đei khăm, ƀet pơgang bơ̆ng. Hăm dôm ŭnh hnam đei rong kŏ, meo ‘noh dăh ƀet pơgang bơ̆ng ăn kơ kŏ meo bơ̆n hloi. Hăm rim tơring, kăl atŏk kơtang dăr lăng găh tơdrong ƀet pơgang bơ̆ng vaccine ăn kŏ meo; adoi ling lang sơđơ̆ng măh mai pơgang vắc-xin, pơgang bơ̆ng vă mưh kon pơlei ‘meh vă yoa ‘noh ƀet bơ̆ng jĭ vơnh ăn kon pơlei hloi.”

Đắk Lắk jei pơgơ̆r Pơm lêh mít tinh păng pơhrăm lơ hơnih jang tang găn hơlou, iung tơjră tang găn Jĭ kŏ vơnh kâp Teh đak sơnăm 2026. Tơdrong pơgơ̆r ou đei vang năm đơ̆ng hloh 1.000 ‘nu bơngai vang năm, hăm rim tơdrong pơgơ̆r mít tinh, iung jang pơrô̆ tơbăt păng pơgơ̆r pơhrăm kơtă găh jang dăr kăng, ƀet vắc-xin ăn kŏ meo păng hơmet pơ ‘lơ̆ng bro đei pơrang jĭ.

Tơdrong kăl lăng hloh ‘noh jĭ kŏ vơnh nhen le pă gơh vă ming hơmet mưh đei ƀôh jĭ, mă lei gơh tang găn hơlou dăh đei ming hơmet trŏ ƀlep mưh kŏ, meo kăp păng tơtom ƀet vaccine, pơgang bơ̆ng. mă lei tơdrong vei lăng năng tông kŏ, meo păng ƀet pơgang bơ̆ng lơ̆m dêh char Đắk Lắk oei đei lơ hơnih lon. Truh khei 7, ƀet vaccine bơ̆ng jĭ Vơnh ăn kŏ, meo kơ dêh char ‘nao lăp jơnei  28,3%, tŏ sĕt hloh tơdrong pơkăp kăl vă pơjing đei bơ̆ng ‘lơ̆ng lơ̆m pơlei pơla. Lơ̆m mă noh, sơmach jĭ kŏ vơnh oei hơnơ̆ng lang să păng lơ pơrang jĭ tơ̆ kŏ meo oei hơnơ̆ng đei ƀôh.

Tang găn hơlou, iung tơjră tang găn jĭ kŏ vơnh, kơ yuơ lơ loh, kăl iung jang hloi đơ̆ng dôm tơdrong hơdăh: mĭnh ŭnh hnam kăl vei lăng năng tông ‘lơ̆ng kŏ meo păng ƀet vaccine mă tôm; ưh kơ hơchăng char kŏ meo; mưh răm kŏ, meo kăp, kach kăl hơmet pơ ‘lơ̆ng rơka ƀlep trong păng năm hloi tơ̆ hnam pơgang vă đei ƀet bơ̆ng. Mưh rim kon pơlei vang iung jang tơnăp, kơdră tơring vang jang kiơ̆ tơnăp păng rim hơnih jang vang iung jang hơdoi kơjăp hloh dơ̆ng, trong tơlĕch jang pă đei bơngai lôch kơ yuơ jĭ kŏ vơnh pơm ăn lơ̆m sơnăm 2030 mă kĕ iŏk đei jơnei.