Kiơ̆ hla ar chih tơ roi đơ̆ng Hơnih vei lăng tơ drong jĭ jăn dêh char Dak Lak (CDC Dak Lak), jô̆ truh dang ei, lơ̆m dêh char chih iŏk 8.433 'nu jĭ pơlŏ lĕch đe, tŏk 25% pơ ting hăm khei 'nâu sơnăm sơ̆. Hơdrô̆ dôm năr tơjê̆ âu, rim năr chih iŏk hlŏh 100 'nu. Đĭ đei 2 'nu lôch tơ̆ phường Tân An păng xăh Quảng Phú. Dôm tơring đei hơmơt kơ jĭ tôch dêh păng lơ bơngai jĭ, ‘noh đei phường Buôn Ma Thuột, Tân Lập, Tân An, Ea Kao păng dôm xăh Ea H'leo, Hòa Phú, Tân Tiến, Krông Pắk, Ea Tul, Cư M'gar. Phường Thành Nhất păng dôm xăh Ea Knuếch, Pơng Đrang, Ea Đrông, Ea Na, Ea Drăng găh grŭp hơ mơt kơ jĭ lơ.

Kơsô̆ bơngai jĭ tŏk hrĕnh lơ̆m dôm năr tơ jê̆ âu đei akhan ‘noh jĭ ƀơm truh ‘mi đunh, pơm hiôk ăn mur brĕnh chek lar păng tơpoh jĭ. Lơ̆m kơplăh ‘noh, tơdrong jang tang găn jĭ tơ̆ 1,2 tơring tam mă đei yua, kon pơlei oei pơm pơ hơi.

Ƀak si Hoàng Hải Phúc, Kơdră vei lăng CDC Đắk Lắk tơbăt, kơsô̆ bơngai jĭ tŏk lơ pơm ăn Khoa hơmet jĭ hơioh păng nge ‘nao rơneh, Hnam pơgang Đa khoa tơring Tây Nguyên ling lang kơ hrăt hrot; lơ anih jang pơgang teh đak păng kơdih tơ̆ păh Pơmơ̆t dêh char Đắk Lắk kŭm pŭ kơhret lei lăi. CDC Đắk Lắk tŏk bŏk hăt tơlĕch jang dôm trong jang tơ jur bơngai jĭ ‘nao, vei lăng hơnih đei jĭ, ưh kơ lê̆ jĭ lanh să.

“Hơnih tơm Vei lăng jĭ jăn dêh char Đắk Lắk pơchoh trong ăn Hơnih jang Vei lăng jang pơgang dêh char, Hơnih vei lăng kon pơlei dêh char pơjing tơdrong tơchơ̆t pơrô̆ athei Hơnih vei lăng kon pơlei rim tơring, phương kăl atŏk kơtang bơ̆ jang tang găn pơrang jĭ kiơ̆ trong tơlĕch jang rim ‘măng hơmet pơ ‘lơ̆ng rơgoh cham char; hăm kon pơlei kăl vei lăng năng tông kơdih ‘noh tơm hloh. Hăm hơnih jang vei lăng jang pơgang, nhôn ăn kang ƀô̆ jur truh tơ̆ rim tơring đei pơrang jĭ dăr lăng, lăng hơlen găh bơ̆n hơngĕnh mŭr măih, găh sío vă pơtruh ăn gre, kmăi kmŏk, iŏk yoa pruih pơgang hăm gre ôtô vă pơlôch mŭr măih, klanh”.

Kiơ̆ đơ̆ng Hơnih tơm vei lăng jĭ jăn, đơ̆ng blŭng sơnăm ou truh dang ei, lơ̆m dêh char Gia Lai đei ƀôh 7.600 ‘nu bơngai jĭ pơlŏ lĕch đe păng 1 ‘nu bơngai lôch. Pơtêng hăm sơnăm 2025, măt bơngai jĭ tŏk 5.059 ‘nu bơngai. Lơm dêh char đei 393 hơnih pơrang, tŏk 28 hơnih pơrang jĭ pơtêng hăm dôm khei ou sơnăm 2025. Hơnih jang Pơgang pơkă tang găn hơlou, iung tơjră tang găn jĭ pơlŏ lĕch đe ‘noh tơdrong jang kăl đei jang kiơ̆ hơnơ̆ng, mă kăl lơ̆m pơyan ‘mi, jơ ‘năr roi rơvơn ăn mŭr măih chek lar char lơ. Tơdrong iung jang hơdoi kơjăp ƀar păh hơnih jang Pơgang, khul kơdră chĕp pơgơ̆r tơring păng kon pơlei, mă kăl hơmet pơ ‘lơ̆ng dôm tơmam đak tơ̆ng kơtă lơ̆m ŭnh hnam gô tơgop kĕ vei lăng năng tông véc tơ tơpoh jĭ, pơm dă ƀiơ̆ măt bơngai jĭ păng hơmơt pơrang lang să, đơ̆ng noh vei lăng năng tông jơhngơm pran jăng grăng akou ăn kon pơlei pơla.