Truh khăm tơ̆ Anih jang pơgang Phú Hòa, mŏ Lê Thị Bích Loan, oei tơ̆ plei Phú Thạnh, xăh Phú Hòa 2, dêh char Đắk Lắk chih măt lơ̆m kơmăy pơvih pơvăn kơdih, oei krao ‘noh kiosk pơgang hơgei, ‘măn tơ̆ hơnih sơng tơmoi. Lăp kăl kơ ăn mã QR lơ̆m the ƀao hiêm pơgang dăh mă kăn kươk kon pơlei lơ̆m kơmăy pơih, kơmăy đŏk kơdih hơnăn, tơgŭm sư dă ƀiơ̆ kơ chih tơroi păng iŏk kơsô̆ tơrih kơtă lơ̆m kơmăy. Mŏ Loan lăng ƀôh, pơm lơ̆m kơmăy tôch kơ ƀônh, đơ̆ng bơngai mơlôh truh bơngai kră kŭm gơh yua.

“Inh ƀôh kơmăy âu tôch kơ ƀônh ăn bơngai jĭ, roi tơbăt hơdăh. Kơdih kâu inh 'noh oei mơlôh, mă lei đe mih ma duch nă oei gơh yua. Đei kơmăy âu 'noh ba kâu kơtĭt kơsô̆ tơreh hrĕnh ƀiơ̆, ưh kơ đei gô đunh, hiơ̆ hyĭn dăh mă bơngai truh hơdrol khăm đơ̆ng rŏng, bơngai đơ̆ng rŏng truh khăm hơdrol".

Kơmăy chih măt khăm chă pơvih kơdih đei tơmơ̆t yoa tơ̆ Anih jang pơgang Phú Hòa đơ̆ng khei 9 sơnăm 'nâu, rim 'măng chih măt lăp hiong tam truh 1 pơnĭt. Kơmăy tơgŭm tơ jur kơsô̆ bơngai jang athei hơmet ăn hơnơ̆ng tơ̆ anih sơng iŏk, 'măn bơngai jang ăn dôm hơnăp jang nai.

Ƀak si Lương Văn Phước, Kơdră vei lăng Anih jang pơgang Phú Hòa tơbăt, iŏk yua ‘noh rơđăh iŏk đơ̆ng hơtuch khei 7 truh dang ei, anih jang pơgang hơdai hăm tơlĕch jang khăm jơhngơ̆m pran đĭ đăng kon pơlei, hăm hloh 3.500 'nu bơngai hlôi đei khăm.

“Iŏk đơ̆ng tơlĕch jang kơmăy âu ‘noh tơdrong vei lăng bơngai jang đei hiôk hloh, hơdrol ki noh athei hơmet ăn lơ bơngai, dang ei lăp kăl 1 truh 2 'nu noh jĭ hlôi keh đang đei tơdrong jang noh. Đei tơdrong hiôk vă bơ̆n pơtruh minh kơsô̆ kang ƀô̆ vă tơgŭm ăn dôm hơnih nai khăm, mă loi ‘noh jĭ hơnih khăm jơhngơ̆m pran đĭ đăng kon pơlei tŏk bŏk minh ‘măng tơlĕch jang. Lăp kăl sơng iŏk tơ̆ âu đe gơh hơtŏk tơpăt hơnih khăm, hŭt lê̆ trong hơlen kơmăy kơmŏk đơ̆ng dôm khoa, lăm”.

Tơdrong chă đŏk kơdih kơtơ̆ng ang bơngai jĭ lơ̆m tơdrong sơng iŏk tơgŭm Anih jang pơgang Phú Hòa dă ƀiơ̆ tơdrong jang chih tơmơ̆t păng hơmet ăn bơngai jang. 'Nâu kŭm jing tơdrong 'meh vă tơpă yan âu lơ̆m tơplih kơsô̆ tơ̆ anih jang: kơmăy kơmŏk trŏ lăp, ƀônh kơ yua, 'mơ 'met jơ năr ăn pơđĭ kon pơlei păng kang ƀô̆ bơ̆jang.

Yă Huỳnh Thị Son, Bí thư Đảng xăh Phú Hòa 1, dêh char Đắk Lắk tơroi, kŭm hăm jên jang đơ̆ng teh đak, khei 'năr âu ki tơring hlôi iŏk đei lơ tơdrong tơgŭm đơ̆ng jên vang tơgop lơ̆m tơpôl. Kơmăy chih măt khăm tơ̆ Anih jang pơgang Phú Hòa yoa đơ̆ng Agribank Anih jang tơ̆ Phú Yên tơgŭm 'nŏh jĭ mĭnh lơ̆m kơsô̆ 'nŏh.

“Lơ̆m khei 'năr âu ki, xăh Phú Hòa 1 iŏk đei lơ tơdrong vang yak hơdai, vang tơgŭm đơ̆ng dôm kŏng ti, dôm anih tĕch mơdro tơ̆ tơring, mă loi 'nŏh jĭ tơdrong jang tơplih hăm kơmăy kơsô̆. 'Nâu kŭm jing tơdrong tơgŭm kăl hloh, vang tơgop pơjing dơ̆ng jên jang ăn xăh Phú Hòa 1 lơ̆m tơdrong jang tơplih hăm kơmăy kơsô̆ lơ̆m đĭ đăng dôm tơdrong jang".

Kiơ̆ đơ̆ng Anih vei lăng jang pơgang Đăk Lăk, tơplĭh kơsô̆ tŏk bŏk đei tơlĕch jang kiơ̆ đơ̆ng hla ar chih tơdrong jĭ, hô sơ jơhngơ̆m pran điên tư trŭh chă kla jên ư̆h kơ yua jên măt păng rim tơdrong pơvih pơvăn ăn khăm hơmet jĭ jăn. Jăl jang 2026-2030, Đăk Lăk hlôi drơ̆ng mĭnh nơ̆r trong jang hơmet ăn vă jê̆ 484 ti hlak jên ăn 7 tơdrong jang pơgang kơsô̆. Kŭm hăm jên tơmơ̆t jang đơ̆ng Tĕh đak, dêh char kŭm pơtrŭt hơvơn jên jang tơpôl vă tơmơ̆t dơ̆ng, hơtŏk ‘lơ̆ng tơdrong pơvih pơvăn tơ̆ rim tơdrong jang trŏ lăp.

Đơ̆ng rŏng kơ tơmơ̆t hơdai, dêh char Đăk Lăk đei 36 anih khăm hơmet jĭ đei giơng ƀich hơmet, đei 14 hnam pơgang păng 22 anih jang pơgang. Kiosk pơgang hơgei dang ei hlôi đei tơlĕch jang tơ̆ 15 anih jang. Lơ̆m noh, Agribank Anih jang Phú Yên tơgŭm kơmăy kơmŏk tơ̆ Anih jang pơgang Phú Hòa păng Anih jang pơgang Sơn Hòa. Ƀok Phan Thông Thái, Kơdră vei lăng Anih Agribank Anih tơ̆ Phú Yên tơbăt, anih jang tŏk bŏk đei trong jang hơnơ̆ng tơgŭm dôm kơmăy kơmŏk chă pơvih ăn kơdih lơ̆m tơdrong jang pơgang păng pơm hla ar tơ̆ dôm xăh, phường lơ̆m tơring.

“Nhôn tŏk bŏk đei tơdrong jang hơnơ̆ng tơgŭm Kiosk jang pơgang hơgei păng dôm Kiosk ăn dôm kơdră tơring dơ̆ng, tơgŭm dôm tơmam kơmăy kơmŏk vă pơm liơ tơgŭm kon pơlei đei sa yua dôm đei yua đơ̆ng tơplih kơsô̆."

Jên đơ̆ng tơpôl vang tơgop ưh đei tơplih tơdrong tơmơ̆t jên jang đơ̆ng Teh đak, mă lei gơh tơmơ̆t dơ̆ng lơ̆m dôm tơdrong 'meh vă hơdăh tơ̆ tơring. Hăm dôm tơmam kơmăy kơmŏk păng jên jang trŏ lăp ‘meh vă iŏk yua tơpă yan âu tơ̆ tơring, iŏk yua tơplih kơsô̆ gơh ƀôh hloi kiơ̆ dôm tơdrong tơplih hơdăh. Nhen tơ̆ mĭnh ƀar hơnih jang pơgang kơ dêh char Đăk Lăk, iok yua tơƀôh hơdăh kiơ̆ đơ̆ng tơmam drăm kơmăy kơmŏk đei tơmơ̆t lơ̆m iŏk yua hlôi tơgŭm ăn kon pơlei dă ƀiơ̆ pơm păng tơjur jơ năr gô.