Truh tŏk bŏk khei 9/2026, anih jang pơgang dêh char Lâm Đồng chih iŏk đei hloh 4.200 'nu bơngai jĭ jơ̆ng ti ƀơ̆r, lơ̆m noh đei 2 'nu lôch tơ̆ tơring Đức Trọng. Jĭ pơlŏ lĕch đe kŭm chih iŏk hloh 4.500 'nu bơngai jĭ păng 1 'nu bơngai lôch. Lơ̆m hloh 1 giĕng âu ki anih jang pơgang dêh char Lâm Đồng chă ƀôh dơ̆ng 5 anih jĭ jơ̆ng ti ƀơ̆r hơtŏk kơsô̆ đơ̆ng blŭng sơnăm truh dang ei truh 75 hơnih jĭ. Dôm hơnih jĭ đei ƀôh tơ̆ tơpôl păng pơđĭ hloi lơ̆m hnam trưng hŏk. Pơting hăm khei 'nâu sơnăm sơ̆, kơsô̆ bơngai jĭ jơ̆ng ti ƀơ̆r tơ̆ Lâm Đồng tŏk lơ hăm 2.040 'nu bơngai jĭ păng jĭ pơlŏ lĕch đe kŭm tŏk 240 'nu bơngai.

Tơdrong tơm đei băt hơdăh pơm ăn jĭ jơ̆ng ti ƀơ̆r păng pơlŏ lĕch đe tơ̆ dêh char Lâm Đồng tŏk lơ yua đơ̆ng tŏ 'mi kial ưh kơ 'lơ̆ng, hơyuh hngôm lơ 'noh jĭ tơdrong hiôk ăn kơ mur chek lar păng tơpoh jĭ. Khei 9 kŭm jing khei 'năr hŏk tro năm hŏk dơ̆ng tơ̆ hnam trưng pơm ăn jĭ jơ̆ng ti ƀơ̆r tơpoh lanh mă loi 'noh jĭ tơ̆ jăl hŏk mầm non păng jăl mônh.

Anih vei lăng jang pơ gang dêh char Lâm Đồng dang ei tŏk bŏk tơlĕch lơtrong jang vă tang găn jĭ jơ̆ng ti ƀơ̆r păng pơlŏ lĕch đe, lơ̆m noh akŏm lơ̆m tơdrong tang găn tơpoh lanh; hơtŏk loi dơ̆ng tơdrong jang tang găn jĭ ăn khŭl kang ƀô̆, thây kô pơtho păng bơngai jang pơgang hnam trưng hŏk; akŏm tơlĕch jang Tơdrong jang akŏm pơm rơgoh cham char, pơlôch klanh; anih khăm, hơmet jĭ, hơmet ming trong klăih song, iŏk akŏm, hơmet; lăng kăl chă ƀôh hrôih tơdrong đei ƀôh jĭ ăl đơ̆ng bơngai jĭ jơ̆ng ti ƀơ̆r păng pơlŏ lĕch đe vă hơmet tơtom, găn ƀiơ̆ tơdrong jĭ ăl…

Anih vei lăng jang pơgang dêh char Lâm Đồng kŭm hlôi pơjao ăn Anih vei lăng tơdrong jĭ jăn dêh char jăh hơlen lăng mă trŏ yŏng jĭ pơm tơlĕch jĭ jơ̆ng ti ƀơ̆r păng pơlŏ lĕch đe vă hơlen lăng tơdrong krê, tơdra hơdrol hrôih tơdrong jĭ kŭm nhen pơjing trong jang tơjră mă lăp.