Ƀak si Hoàng Hải Phúc tơbăt, bơngai jĭ lôch ‘măng âu ‘noh mon Y.J.P.H.Đ. (5 sơnăm, oei tơ̆ xăh Krông Năng, dêh char Đắk Lắk). Lơ̆m ‘năr 30/4, mon đei ƀôh dôm tơdrong jĭ lap rơmơ̆n, hli kơ hơdăh, hli kơ kial, sŏng sa ưh kơ lŭ, tơgok hăk păng jĭ klak. Truh ‘năr 2/5, mon đei chơ ba tơ̆ Hnam pơgang Đa khoa Tơring Tây Nguyên vă khăm păng hơmet.

‘Năr 3/5, tơdrong jĭ đei ƀôh roi dêh, lăng pă đei hơnhŏ kơ hơrih. Ŭnh hnam apĭnh ba mon vih tơ̆ hnam hăm hơlen lăng jĭ: pơchŭng pham, ưh kơ ‘lơ̆ng tơ̆ lơ hơ nih lơ̆m hơkâu, lĕch pham trong klak, jĭ ‘ngok, răp hơlen lăng jĭ vơnh păng ưh kơgơh dui jơhngơ̆m độ IV. Hơdai lơ̆m năr, hơioh jĭ lôch tơ̆ hnam. Kiơ̆ bơngai lơ̆m ŭnh hnam, dang 4 khei hơdrol kơ ƀĭch tơ̆ hnam pơgang, mon đei 1 pôm ‘meo dang 6 khei kach ƀơ̆t ti păih ‘ma.