Hơnih vei lăng kon pơlei dêh char Gia Lai ‘nao pơjing trong iung jang ăn ƀak si năm jang tơ̆ rim hnam pơgang tơring, phương vă atŏk kơtang jang ‘lơ̆ng tơdrong jang pơgang tơring păng pơm hơtŏk jang ‘lơ̆ng vei lăng năng tông jơhngơ̆m jăn ăn kon pơlei. Kiơ̆ vă jang, sơnăm 2026, dêh char gô ăn 38 ‘nu ƀak si đơ̆ng rim hnam pơgang păng hơnih khăm jĭ jăn ŭnh hnam iung năm bơ̆ jang tơgŭm djru tơ 30 tơring, phương. Hrei ou, dêh char đei 135 hnam pơgang tơring hăm dang 370 hơnih jang pơgang, mă lei oei đei 3 hnam pơgang tơring tim mă đei ƀak si păng 76 hơnih jang pơgang tim mă đei ƀak si bơ̆ jang. Tơdrong ăn ƀak si năm jang gô tơgop vei kơjăp jang ‘lơ̆ng khăm ming hơmet jĭ jăn ăn kon pơlei, pơm dă ƀiơ̆ đei lơ bơngai jĭ ming hơmet tơ̆ hnam pơgang kơpal. Rim ƀak si ăn năm jang ou oei iung jang pơtho hloi rim bơngai jang pơgang tơring. Tơdrong vă jang ou lăng kơjăp dôm tơring hơtăih yăih, tơring sơlam teh đak păng tơring kon kông.

Anih jang pơgang dêh char Đắk Lắk tŏk bŏk tơlĕch jang Khei bơ̆jang khăm jơhngơ̆m jăn hơnơ̆ng ăn kơ kon pơlei kiơ̆ Tơdrong tơchơ̆t kơsô̆ 72 đơ̆ng Khŭl kơdră chĕp kơ̆l pơgơ̆r Trung ương Đảng. Tơdrong tơlĕch jang păng khăm hơlen ăn bơngai kră đei pơgơ̆r hrơ̆ch tơ̆ phường Tân An, phường Tuy Hòa, xăh Krông Bông păng xăh Đồng Xuân vă lăng băt hơdrol kơ tơlĕch jang jơ̆p lơ̆m dêh char đơ̆ng ‘năr 1/7. Dôm anih jang pơgang hlôi hơmet ăn tôm bơngai jang, tơmam kơmăy kơmŏk, pơgang pơyua ăn tơdrong jang khăm jơhngơ̆m jăn.

Grŭp bơngai tơgŭm hơdrol ‘noh bơngai kră, bơngai đei kŏng, bơngai jo jăn, ŭnh hnam dơnuh hin, ŭnh hnam vă jê̆ dơnuh, bơngai đei tơdrong jĭ hơmet ưh kơ klăih, kon pơlei kon kông păng kon pơlei tơring pơmat tat. Anih vei lăng jang pơgang hlôi pơjing trong tơlĕch jang hơdăh, klăih song hơnăp jang ăn kơ rim anih jang, vei sơđơ̆ng tơdrong jang đei tơlĕch jang đei yua tơ̆ 102 xăh, phường lơ̆m dêh char.