VOV4.Bahnar - Lơ̆m dôm sơnăm tơjê̆ âu, anih jang pơgang kơdih hlôi tơgop ‘lơ̆ng ăn tơdrong khăm hơmet jĭ tơ̆ Đắk Lắk. Hăm tơdrong jang tŏk pran ‘lơ̆ng đơ̆ng dôm hnam pơgang đơ̆ng kon pơlei pơjing, kon pơlei lơ̆m dêh char ưh lăp đei dơ̆ng tơdrong vă rơih anih khăm hơmet jĭ đech, mă oei xa yoa đơ̆ng lơ tơdrong tơplih ‘nao găh kơmăy kơmŏk khăm hơmet jĭ dơ̆ng.

VOV4.Bahnar – ‘Năr brei (27/2), dêh char Đắk Lắk pơm lêh tơbăt 70 sơnăm Năr ƀok thây pơgang Việt Nam (27/02/1955 - 27/02/2025), chih hơdăh tơdrong jang tŏk pran ‘lơ̆ng păng tơdrong tơgop tih đơ̆ng anih jang pơgang lơ̆m tơdrong vei lăng jơhngâm pran ăn kon pơlei; bơnê kơ dôm tơdrong tơgop đơ̆ng rim jơhnơr ƀok thây pơgang, kăn ƀô̆ jang pơgang tơ̆ dêh char.

VOV4.Bahnar -  Vă jê̆ 20 sơnăm tơklep hăm tơring sơlam teh đak, ƀak si Nguyễn Văn Quốc Trí, Kơ iĕng Kơdră Hơnih khăm ming hơmet jĭ ƀô̆ đô̆i kon pơlei AXan găh Kơđông Ƀô̆ đô̆i vei lăng sơlam teh đak Tr’hy, Ƀô̆ đô̆i vei lăng sơlam teh đak dêh char Quảng Nam ling lang kơrŭn hŏk pơhrăm pơm hơtŏk tơdrong jang gơ̆h hơgei, vei lăng năng tông jơhngơ̆m jăn ăn kon pơlei oei tơ̆ tơring sơlam teh đak. Mă kăl, lơ sơnăm ou ki, ƀak si Trĭ oei dŏng hơrih ăn lơ kon pơlei pơnhul sa pơmou, hla ngón, sut sôch, ƀih kăp, mă kăl đe hơnhal tŏk bŏk trong vă năm tơ̆ hnam pơgang …Dôm tơdrong jang ‘lơ̆ng hơ iă đơ̆ng ƀak si Nguyễn Văn Quốc Trí tơƀôh hơdăh jơhngơ̆m đon ‘mêm kơ eng, tơgoăt tơgoăl kơjăp ƀar păh ƀô̆ đô̆i hăm kon pơlei, pơjing đei jơhngơ̆m đon lui yom kơtang đơ̆ng kon pơlei oei tơ̆ tơring sơlam teh đak.  

VOV4.Bahnar - Kiơ̆ kơ yuăn khan Thụ tinh lơ̆m ống nghiệm jĭ trong tơgŭm rơneh ‘nao păng đei yua hloh hrei ‘nâu ‘măn ăn kơ đe klo kăn hơvŏng. Kiơ̆ chih jô̆, kơsô̆ ưh kơ đei kon tơ̆ pơđĭ drŏ nglo păng drŏ kăn hrei ‘nâu tŏk bŏk roi ‘năr roi tŏk, vă khan hăm tơdrong roi ‘năr roi lơ ŭnh hnam tơchă truh trong thụ tinh trong ống nghiệm hăm ‘meh vă chă kon. Mă lei, ‘nâu jing 1 ki thuơ̆t  y khoa athei đei lơ jên păng jơhngơ̆m pran, mă hơdrin, yua thoi noh klo kăn kăl kơ chă hơlen lăng mă hơlen păng mơ̆ng nơ̆r pơtho tơtă đơ̆ng ƀak si vă hơtŏk kơsô̆ jơnei thụ tinh trong ống nghiệm.

VOV4.Bahnar - Dôm sơnăm tơjê̆ âu, tơdrong hơioh tang ‘yar (nơ̆r yoăn khan ‘nŏh dậy thì) hrôih roi đunh roi lơ, pơm ăn lơ mĕ ƀă pơngơ̆t. Tang ‘yar hrôih ưh lăp ƀơm truh jơhngâm pran, hơkâu jăn đĕch mă oei ƀơm truh đon tơchĕng đơ̆ng đe hơioh hai. Lơ mĕ ƀă athei lăng tông, mưh ƀôh kon tang ‘yar hrôih ‘nŏh chơ kon năm khăm, hơmet hloi, mă lei kŭm đei lơ bơngai ưh tam mă băt hơdăh tơdrong ‘nâu, ưh đei hơmet tơtom, pơm ăn hơioh pŭ lơ tơdrong ưh kơ ‘lơ̆ng.

VOV4.Bahnar – Hloh 300 'nu tang măt đơ̆ng dôm anih jang pơgang hơmet jĭ jăn lơ̆m jơ̆p teh đak vang Hop akŏm khua hŏk đei pơgơ̆r tơ̆ Hnam pơgang Đại học Y Dược Buôn Ma Thuột, dêh char Đăk Lăk. 'Nâu jĭ minh tơdrong jang vă tơbăt 70 sơnăm Năr Thâi pơgang Việt Nam (27/2).

VOV4.Bahnar - Đơ̆ng blŭng sơnăm truh dang ei, Hnam pơgang Hơmet hơioh jĭ Gia Lai sơng iŏk vă jê̆ 500 ‘nu hơioh ƀĭch tơ̆ hnam pơgang yua đơ̆ng jĭ grŏnh, tŏk lơ pơting hăm khei ‘nâu sơnăm  2024. Tơdrong ‘nâu pơm ăn Khoa Jĭ nhiệt đới hrăt hrot tôch kơdêh.

VOV4.Bahnar - Gre tơ̆m, pơ̆k, preh băl oei đei ƀôh rim năr, rim jơ, iŏk lê̆ jơhngơ̆m pran, tơdrong hơrih kơ lơ bơngai. Tơdrong sơng iŏk kâp kư̆u, hơmet ăn bơngai jĭ đơ̆ng gre tơ̆m, pơ̆k, preh băl đĭ mơmat tat, hăm dôm bơngai jĭ đơ̆ng gre tơ̆m, pơ̆k, preh băl ƀơm truh et tơdrô hơlăk, ƀier oei mơmat tat,hơnat hơnot hloh dơ̆ng.

VOV4.Bahnar - Dôm năr âu, anih jang pơgang Đắk Lắk hơnơ̆ng kơchăng vă vei sơđơ̆ng tơdrong jang khăm hơmet jĭ, kâp kư̆u. Đơ̆ng dôm dôm hnam pơgang tih tơ̆ pơlei tơm Buôn Ma Thuột truh tơ̆ dôm hnam pơgang tơ̆ dôm apŭng, dôm hnam pơgang tơring hlôi hơmet tôm tơ jră hăm rim tơdrong đei ƀôh kăl, tơgŭm kon pơlei đei 1 Têt sơđơ̆ng hiôk.

VOV4.Bahnar - Vă vei lăng rơgoh ‘lơ̆ng tơmam sa, tang găn tôch ai dôm ‘măng pơnhŭl tơmam sa năr Tết Nguyên đán Ất Tỵ păng pơyan Lêh Puih mak 2025, Khŭl pơgơ̆r jang lơ Anih jang Trung ương găh vei lăng rơgoh ‘lơ̆ng tơmam sa hlôi pơjing Khŭl hơlen lăng lơ anih jang, tơm hơlen lăng tơ̆ 10 dêh char, pơlei tơm đơ̆ng dêh char, pơlei tơm truh xăh, phường. Tơdrong tơm gô akŏm hơlen lăng dôm tơmam, grŭp tơmam yua lơ lơ̆m năr tết, akŏm hơlen lăng tơdrong pơm kiơ̆ dôm tơdrong hơgăt khôi luơ̆t lơ̆m pơm tơlĕch tĕch mơdro tơmam sa, dôm hơnih tĕch mơdro tơmam et sa lơ̆m kơplăh hơlen lăng kăl kơ rơđăh kơsô̆ lơ, tơdrong pơm glăi vă đei lăng kiơ̆ hơdăh păng phak kiơ̆ tơdrong hơgăt. Hơdai hăm, tơgep tơroi tơbăt găh vei lăng rơgoh ‘lơ̆ng tơmam sa lơ̆m kơplăh hơlen lăng.