VOV4.Bahnar – Kơsơ̆ năr 28/5, Phŏ Thủ tướng Vũ Đức Đam, Kơdră Jơnŭm pơgơ̆r jang kơ teh đak găh tang găn păng tơjră jĭ COVID-19 hlôi hop akŏm trư̆k tuyê̆n, tơmơ̆ng tơroi găh tơdrong jang tang găn păng tơjră pơrang jĭ tơ̆ ƀar dêh char Bắc Ninh, Bắc Giang. Kiơ̆ tơroi, dêh char Bắc Giang hlôi iŏk hơlen pham hăm dôm tơring tam mă hơbuh pơrang, dôm apŭng tam mă tơklăh oei ataih băl lơ̆m tơpôl; hơtŏk hơlen dôm bơngai mă hien, pơlŏ. Tơ̆ Bắc Ninh, đơ̆ng rŏng kơ đei bơngai ƀơm jĭ tơ̆ anih jang kŏng ngĭp Khắc Niệm, dêh char Bắc Ninh tŏk bŏk oei tơlĕch jang kơjăp dôm trong jang, lơ̆m noh drŭt tenh tơdrong hơlen pham lơ̆m tơring, hăm hloh 30 rơbâu tơpu pham đei akŏm. Lơ̆m hop akŏm, Phŏ Thủ tướng Vũ Đức Đam pơkăl, dêh char Bắc Ninh păng Bắc Giang pơtoi akŏm iŏk hơlen lang xă vă tang găn pơrang jĭ tơpoh lang xă, vei xơđơ̆ng ăn dôm anih jang kŏng ngĭp.

Lan chih păng pơre nơ̆r