VOV4.Bahnar - Pơgê năr 10/12, hơnơ̆ng pơgơ̆r hop akŏm ‘măng mă puăn, Jơnŭm vei lăng kon pơlei dêh char Gia lai jăl XII, rim kơdră tang măt hlôi tơbăt hơdăh pơtôch chă pơma dơnŭh tơ̆ khŭl hăm lơ tơdrong kăl.

Tơ̆ hop akŏm, rim kơdră tang măt drơ̆ng mĭnh nơ̆r lăp đon hăm hla bơar chĭh tơbăt pơtôch bơ̆ jang kiơ̆ tơdrong jang mŭk drăm - tơpôl, tơdrong chĕp pơgơ̆r đơ̆ng Dơnŏ anĭh vei lăng kon pơlei dêh char lơ̆m sơnăm 2021. Rim kơdră tang măt akhan, mă đơ̆ng tơ jră mŭh măt hăm lơ tơdrong tơnap tap, tơdrong long đơ̆ng jĭ hơbŭh Covid-19, mă lei, tơdrong jang mŭk drăm-tơpôl lơ̆m dêh char Gia Lai sơnăm au đei lơ tơdrong hơ iă. ‘Ngoăiyh kơ ‘nŏh, mĭnh ƀar tơdrong jang tim mă ‘lơ̆ng hơ iă đei kơdră tang măt tơroi tơbăt hơdăh, pơma dơnuh dĭh băl tơ̆ hop akom. Lơ̆m ai, twodrong pơtho, hŏk trư̆k tuyên, tơdrong tơgum djru tĕch mơdro tơmam drăm chŏh jang sa ăn kon pơlei lơ̆m pơyan jĭ hơbŭh đei rim kơdră tang măt lăng trŭh. Tơdrong ư̆h gan ‘lơ̆ng đơ̆ng pơtho hŏk kiơ̆ internet ‘nŏh, lăp tơlĕch pơtho tơ̆ tơring đei rơvơn ‘nŏh mă iŏk đei jơnei, kơna pơm kơnê̆ trŭh tơdrong pơtho pơhrăm ăn hŏk tro tơ̆ tơring tơnap tap. Găh tơdrong tơgum djru kon pơlei, hơp tak xah tĕch mơdro tơmam drăm chŏh jang sa jei tim mă iŏk jơnei hơ iă lơ̆m pơyan jĭ hơbŭh, kăl tơchĕng hơlen trong jang tơgŭm ăn mă đei jơnei hlŏh dơ̆ng.

Tơblơ̆ nơ̆r: Amazưt