VOV4.Bahnar - Vă sơđơ̆ng ŭnh hơyŭh lơ̆m rim năr Têt dương lĭch păng Têt nguyên đán Nhâm Dần 2022, Grŭp jang Kmăi ŭnh hơyŭh Việt Nam (EVN) athei rim hơnĭh jang ư̆h kơ jang rim tơdrong kăl athei pơdơ̆h, tơ jur pơtrŭh ŭnh hơyŭh pơm ăn kon pơlei ư̆h kơ đei ŭnh hơyŭh, lăp iung jang tơdăh đei tơdrong sar bar lơ̆m rim năr Têt Dương lĭch (đơ̆ng tŏk bŏk măng năr 31/12/2021 trŭh đĭ 24 jơ năr 03/01/2022), Têt Nguyên đán Nhâm Dần 2022 (đơ̆ng tŏk bŏk măng năr  30/01/2022 trŭh 24 jơ năr 03/02/2022).  Atŭm hăm khŭl kơdră bơ̆ jang, bơ̆ jang vei lăng kmăi kmŏk, ming hơmet ŭnh hơyŭh ‘nŏh jang prăt măng prăt năr lơ̆m rim năr Lêh Têt, EVN athei rim hơnĭh jang hơmet ăn tôm tong tơmam drăm, kmăi kmŏk păng gre bơ̆ jang, iung jang hloi tơdăh đei tơdrong sar bar. Lăng kơ jăp hơmet ăn tơmam drăm, jơhngơ̆m đon ăn khŭl bơ̆ jang lơ̆m khei ‘năr Têt dương lĭch păng Têt Nguyên đán 2022. Lơ̆m tơlĕch jang, kăl jang kiơ̆ kơ jăp rim trong jang tang găn jĭ hơbŭh COVID-19 kiơ̆ nơ̆r pơrô̆ athei đơ̆ng Dơnŏ anĭh tơm jang pơgang, rim hơnĭh bơ̆ jang tơring păng nơ̆r pơrô̆ jang đơ̆ng EVN.

Tơblơ̆ nơ̆r: Amazưt