VOV4.Bahnar - Pơ gê ‘năr 16/11, tơ̆ Hà Nội, hlôi pơ gơ̆r Hop akŏm jên hu Việt Nam 2021 hăm hơ năn “Tơ drong jang jên hu jăl jang 2021 - 2030 păng dôm trong jang tơ iung ming păng hơ tŏk tơ iung mŭk drăm Việt Nam”. Pơ gơ̆r hop akŏm, Phŏ kơ dră Anih tơm vei lăng jên hu Võ Thành Hưng pơ ma hơ dăh, đơ̆ng rŏng vă jê̆ 10 sơ năm jang kiơ̆ Tơ drong jang jên hu truh sơ năm 2020, jên hu kơ teh đak hlôi đei tơ plih hơ dăh păng iŏk đei lơ jơ nei ‘lơ̆ng. Mă lei, Việt Nam oei đei athei tơ jră hăm 1,2 tơ drong tam mă ‘lơ̆ng nhen: pơm hơ tŏ jên jang mơ mat tat, mă loi ‘noh jĭ lơ̆m khei ‘năr jĭ hơ buh Covid-19; pơm kơ hret hơ tŏk tơ lĕch jên jang ăn rim tơ drong hơ găt vei lăng sơ đơ̆ng tơ drong arih sa tơ pôl, vei sơ đơ̆ng khŭl linh,... Yua thoi noh, Phŏ kơ dră Anih tơm vei lăng jên hu Võ Thành Hưng hơ mĕng, dôm nơ̆r pơ tho athei đơ̆ng bơ ngai joăt jang lơ̆m teh đak păng apŭng plĕnh teh gô tơ gŭm dôm trong jang ‘lơ̆ng lơ̆m jang kiơ̆ tơ drong jang jên hu teh đak jăl jang 2021-2030, jang đang dôm trong jang jên hu tơ gŭm tơ iung ming hơ tŏk tơ iung mŭk drăm Việt Nam lơ̆m jăl jang truh.

Thuem: Tơ blơ̆