VOV4.Bahnar - Thủ tướng Tĕh đak Phạm Minh Chính ‘nao pơrô̆, kăl tơplĭh ‘nao trong jang kiơ̆ kmăi kmŏk lơ̆m tang găn jĭ Covid-19.

Thủ tướng Tĕh đak Phạm Minh Chính

Kiơ̆ kơ ‘nŏh, rim kmăi kmŏk hlôi đei Dơnŏ anĭh tơm vei lăng Bơ̆ jang Kơtơ̆ng ang păng Pơre nơ̆r pơjao ăn rim hơnĭh jang mơdro sa kmăi kmŏk lơ̆m tĕh đak pơm tơlĕch lơ̆m khei năr au ki, gô jing tơmam drăm kăl hlŏh kai tơmơ̆t lơ̆m điên thoăi chĕp ti kơ rim bơngai đei điên thoăi mư̆h năm tơ̆ rim hơnih kơdrơ̆m bơngai, tơgop pơm tơchă ƀô̆h oei tơ jê̆, pơm dă ƀiơ̆ pơm kiơ̆ oei hơtăih dĭh băl păng tơchă rim bơngai F1, F2 nhen hrei au. Trŭh au kơnh, Dơnŏ anĭh tơm vei lăng jang pơgang gô chĭh tơlĕch tơdrong tơchơ̆t găh tơdrong kăl kai tơmơ̆t rim ư̆ng dŭng lơ̆m kmăi điên thoăi chĕp ti, vă tang găn jĭ Covid-19.  Lơ̆m đơ̆ng rŏng hop akŏm trư̆k tuyên năr 26/5 hăm 2 dêh char Bắc Ninh hăm Bắc Giang păng mă kăl lăp đơ̆ng rŏng đei nơ̆r pơrô̆ đơ̆ng Thủ tướng Tĕh đak găh atŏk kơtang jang kiơ̆ kmăi lơ̆m tang găn jĭ Covid-19, Dơnŏ anĭh tơm vei lăng Bơ̆ jang Kơtơ̆ng ang păng Pơre nơ̆r hlôi athei kai tơmơ̆t hloi mĭnh ƀar ư̆ng dŭng kơ yuơ Việt Nam pơm tơlĕch.

Tơblơ̆ nơ̆r: Amazưt