VOV4.Bahnar - Tơ̆ hơ năp đei ƀôh krê hơ mơt đơ̆ng jĭ Covid-19, Lâm Đồng athei kang ƀô̆, bơ ngai jang teh đak păng bơ ngai jang tơ̆ rim anih jang lơ̆m dêh char athei pơm kiơ̆ hơ len lăng 3 năr 1 ‘măng. ‘Năr 23/11, dêh char Lâm Đồng hơ nơ̆ng đei dơ̆ng 171 ‘nu jĭ Covid-19 ‘nao, hơ tŏk akŏp kơ sô̆ bơ ngai jĭ lơ̆m dêh char tŏk 2.154 ‘nu. Kơ sô̆ bơ ngai jĭ tŏk hrĕnh jô̆ đơ̆ng ƀơ̆t dêh char pơm pơ hơi dôm trong jang ưh kơ ăn yak vih vơ̆t lơ lơ̆m tơ pôl. Kiơ̆ hơ len lăng đơ̆ng Anih vei lăng kon pơ lei dêh char Lâm Đồng, tơ drong tơm pơm ăn jĭ Covid-19 roi tŏk găh lơ ‘noh yua đơ̆ng kon pơ lei rim dêh char, pơ lei tơm tơ ring jĭ năm truh tơ̆ Lâm Đồng pơm tơ poh tơ drong jĭ, hơ mơt kơ đei ƀôh jĭ lơ.

Kon pơ lei năm pơm hla ar hơ len lăng tơ̆ CDC Lâm Đồng

Vă jang kiơ̆ ‘lơ̆ng tơ drong jang hơ dai tang găn jĭ đei yua, vei sơ đơ̆ng jơ hngơ̆m pran, hơ kâu jăn kon pơ lei păng hơ tŏk tơ iung mŭk drăm tơ pôl, Anih vei lăng kon pơ lei dêh char Lâm Đồng athei rim anih jang lơ̆m dêh char pơm kiơ̆ hơ len lăng hrĕnh ăn kang ƀô̆, bơ ngai jang kơ teh đak păng bơ ngai jang 3 ‘năr 1 ‘măng. Hơ dai hăm athei rim khŭl jang, rim bơ ngai năm pơ ma dơ nuh bơ̆ jang athei ƀet tôm kơ sô̆ jrŭm vắc xin păng hơ len lăng ưh kơ đei jĭ lơ̆m khei ‘năr hơ găt.

Thuem: Tơ blơ̆