VOV4.Bahnar - Năr apŭng plenh tĕh kơ đe hơ iŏh păng kŭm jing năr mă blŭng kơ Khei bơ̆ jang yoa đe hơ iŏh sơ năm 2021. Hơ năn khei bơ̆ jang yoa đe hơ iŏh sơ năm ‘nâu ‘nŏh “Vang vei lăng tơ drong pơm tơm kơ đe hơ iŏh, vei lăng hơ iŏh mưh đei tơ drong sar bar tŏ ‘mi kial kơ nê̆, jĭ hơ buh”.

Tơ drong jang gĭt kăl mă blŭng lơ̆m khei ‘nâu ‘nŏh jĭ Anih mong jên tơ gŭm ăn hơ iŏh Việt Nam păng Anih tơm vei lăng tơ drong jang xa, linh jĭ rơ ka păng tơ pôl tơ chơ̆t tơ gŭm por sŏng ăn hlŏh 4 rơ bâu ‘nu hơ iŏh F0 păng F1 athei oei hơ drô̆ vă tang găn jĭ Covid-19.

Kiơ̆ tơ drong tơ chơ̆t âu, hơ iŏh đơ̆ng 0-16 sơ năm oei hơ met jĭ, ăn oei hơ drô̆ gô đei tơ gŭm jên sŏng xa dang 80.000 1 năr 1 ‘nu mon lơ̆m 21 năr. Khei ‘năr jang kiơ̆ đơ̆ng ‘năr 27/4 truh 31/12/2021. Anih mong jên tơ gŭm ăn hơ iŏh Việt Nam krao hơ vơn vang tơ gŭm đơ̆ng dôm anih jang, khul grŭp, rim bơ ngai lơ̆m păng ‘ngoăih kơ tĕh đak vă đe hơ iŏh Việt Nam gơ̆h yak hlŏh khei ‘năr mơ mat tat âu, tơ gŭm ăn đe ŏh đei tơ drong arih xa ‘lơ̆ng hơ iă ƀiơ̆ tơ̆ ning mônh kơnh.

Dơ̆ng: Tơ blơ̆