VOV4.Bahnar  – Anih tơm Axong pơm jang Việt Nam duh 'nao pơgơ̆r pơma đam trư̆k tuyê̆n pơtơm Khei Bơngai pơm jang xơnăm 2021 hăm hơnăn “Tơguăt tơguăl, gơh rơgei, yak hloh tơnap tap, hơtŏk tơ iung”. 

Yuơ tơdrong răm đơ̆ng pơrăm jĭ Covid - 19 noh lơ anih jang mŭk drăm, anih jang păng đoan viên, bơngai pơm jang ƀơm răm tih tên. Hloh kơ lai yơ, kơ trĭu 'nu bơngai jang lơ̆m jâ̆p teh đak kăl tơguăt tơguăl, hơbĕch vă yak hloh dôm tơdrong tơnap tap tơ̆ anăp păng đei jơhngơ̆m kơ 'nôh hơtŏk tơ iung, hơpơi 'moih hơtŏk yuơ tơdrong jơnap ăn kơdih po, unh hnam, tơdrong hơmet hơtŏk kơ anih jang mŭk drăm păng tơdrong jơnap kơ teh đak. Kơyuơ noh mă Khei Bơngai pơm jang xơnăm âu đei hơnăn: "Tơguăt  tơguăl, Gơh rơgei, Yak hloh tơnap tap, Hơtŏk tơ iung." Minh lơ̆m dôm tơdrong tơm kơ khei bơngai pơm jang xơnăm âu noh Tơdrong jang “75 rơbâu tơdrong rơgei, yak hloh tơnap, hơtŏk tơ iung”. Kơsô̆ 75 rơbâu tơdrong rơgei hăm tơdrong 'meh vă bơngai pơm jang Việt Nam băt hơdăh, pôk bơnê, pơm hơtŏk hloh tơchơ̆t 'Năr Apŭng plenh teh Pơm jang tơ̆ Việt Nam đunh kơâu 75 xơnăm đei akŏm mit tinh kăp gĭt tơ̆ Anih tơm Hà Nội. Atŭm hăm noh xơng kơ kuh 75 xơnăm Năr Pôk rơih mă blŭng Kuôk hô̆i teh đak Cộng hòa xã hội chủ nghĩa Việt Nam.

Lan chih păng pơre nơ̆r