VOV4.Bahnar - Pơgê năr 19/5, ƀlep lơ̆m năr tơbăt 131 sơnăm năr rơnĕh Kơdră chĕp pơgơ̆r tĕh đak Hồ Chí Minh, khŭl bơ̆ jang kơ Trung ương Đoàn jang hơdoi hăm Dơnŏ anĭh Đoàn dêh char Trà Vinh pơgơ̆r pơm lê̆h mơt hơpong păng sŏh hlôt nhang tơ̆ Hơnĭh soi tơbăt Ƀok Hô găh tơring Long Đức, pơlei tơm Trà Vinh. Trà Vinh đei hlŏh 47.000 ‘nu bơngai jang đoàn, hơdrŭh tơdăm, hlŏh 5 sơnăm pơgơ̆r tơlĕch hŏk pơhrăm Nơ̆r athei jang kiơ̆ kơsô̆ 05 đơ̆ng Dơnŏ anĭh tơm Chinh trĭ găh “Atŏk kơtang hŏk pơhrăm păng pơm kiơ̆ jơhngơ̆m đon ‘lơ̆ng, trong bơ̆ jang hơgei kơ Ƀok Hô, hlôi pơjing đei jơhngơ̆m đon hlô̆h vao kơtang lơ̆m hŏk pơhrăm, tơ iung pơjing khŭl kang ƀô̆, bơngai jang đoàn. Adoi rim dơnŏ anĭh Đoàn lơ̆m dêh char pơm jŭk yuk trong hơlau jang kiơ̆ trong jang hŏk pơhrăm păng pơm kiơ̆ jơhngơ̆m đon ‘lơ̆ng, bơ̆ jang hơgei kơ Ƀok Hô tơ klep hăm xek tơlang lơ tơdrong ư̆h kơ ‘lơ̆ng hơ iă lơ̆m tơring, hơnĭh bơ̆ jang, tơgop jang kiơ̆ jơnei lơ̆m tơdrong jang atŏk tơ iung mŭk drăm-tơpôl, tơ iung pơjing Đảng, khŭl jang chĭnh trĭ roi năr roi rơgŏh ‘lơ̆ng, kơ jăp iăp kơtang. Ƀlep lơ̆m jơ ‘năr au, Khŭl bơ̆ jang kơ Trung ương Đoàn hăm Dơnŏ anĭh Đoàn dêh char Trà Vinh pơgơ̆r pơtăm 20 dơnơm ‘long pơm yơ̆p lơ̆m cham Hơnĭh gru gra gĭt kăl dăr sơnăm Soi tơbăt au.

Tơblơ̆ nơ̆r: Amazưt