VOV4.Bahnar - Pơ gê ‘năr 12/10, Anih jang Đảng dêh char Kon Tum pơ gơ̆r Hop akŏm ‘măng mă 5 Khŭl chĕp kơ̆l pơ gơ̆r Đảng bộ dêh char jăl 14 pơ̆ih să hăm lơ tơ drong tơm gĭt kăl. Kiơ̆ tơ roi tơ băt tơ̆ hop akŏm, yua kơ ƀơm ưh kơ ‘lơ̆ng đơ̆ng jĭ COVID-19 pơm ăn lơ tơ drong hơ găt găh mŭk drăm kơ tơ pôl kơ dêh char Kon Tum 9 khei đei tŏ sĕt, nhen: thu mong jên jang teh đak lơ̆m tơ ring dang 2.000 ti hlak jên, lăp iŏk đei 59,2% jên thu mong tơ ring pơ jao; kơ sô̆ xăh jang đei tơ ring tơ rang ‘nao tŏk 1 xăh, lăp iŏk đei 12,5% trong tơ lĕch jang; hơ găt teh ‘long pơ gang pơ tăm ‘nao ‘ngoăih kơ sâm Ngọc Linh 960 hek tar, lăp iŏk đei 48% trong tơ lĕch jang...

Hop akŏm ‘măng mă 5 Khŭl chĕp kơ̆l pơ gơ̆r Đảng bộ dêh char Kon Tum jăl 14

Hop akŏm pơ ma dơ nuh, pơ tôch păng pơ drơ̆ng kiơ̆ lơ tơ drong tơ chơ̆t gĭt kăl nhen: Hơ met ming, tơ mơ̆t dơ̆ng tơ drong tơ chơ̆t bơ̆ jang đơ̆ng Anih jang Đảng dêh char Kon Tum jăl 14; pơ tôch tơ drong tơ chơ̆t “ găh hơ nơ̆ng tơ iung pơ jing rim xăh mơ mat tat hloh lơ̆m tơ drong ‘nao”; pơ tôch tơ drong tơ chơ̆t “ găh pơ jing, hơ tŏk tơ iung rim anih jang mŭk drăm tơm păng tơ mam drăm tơm”,...

Thuem: Tơ blơ̆