VOV4.Bahnar - ‘Năr 16/11, Khul drŏ kăn plt Đà Nẵng pơ gơ̆r hop akŏm bơ ngai tang măt ăn đe drŏ kăn plt ‘măng mă XIV, jăl jang 2021-2026. 5 sơ năm âu ki, kăn ƀô̆, bơ ngai jang lơ̆m Khul drŏ kăn plt Đà Nẵng pơ gơ̆r đei lơ tơ drong jang tôch đei yoa, tơ gop ‘lơ̆ng ăn tơ drong vei sơ đơ̆ng tơ drong arih xa tơ pôl, pơm tơ jur tơ nuh hin.

Khul drŏ kăn plt Đà Nẵng iŏk Hla kơ đơ̆ng Thủ tướng tĕh đak pôk ăn

Dôm tơ drong pơ jei băl “Drŏ kăn tơ gŭm băl jang mŭk drăm”, “Tơ gŭm ăn drŏ kăn tơ nuh”… đei tơ lĕch jang ‘lơ̆ng. Rim sơ năm dôm khul grŭp drŏ kăn tơ̆ plt Đà Nẵng tơ gŭm ăn vă jê̆ 5 rơ bâu unh hnam tơ nuh, unh hnam vă jê̆ tơ nuh yak hlŏh mơ mat tat; dôm jĭt rơ bâu ‘nu drŏ kăn tơ nuh đei pơ tho ăn tơ drong jang, chă tơ drong jang sơ đơ̆ng.

Khul drŏ kăn plt Đà Nẵng pơ dơ̆ng hơ năn ăn 50 rơ bâu unh hnam drŏ kăn tŏk iŏk 1.500 ti hlak jên vă jang xa, tĕch mơ dro. Pơ ma lơ̆m hop akŏm, ƀok Nguyễn Văn Quảng, Bí thư đảng plt Đà Nẵng pơ tho, lơ̆m jăl truh, Khul drŏ kăn plt athei hơ tŏk tơ drong tơ roi tơ băt, krao hơ vơn đĭ đăng drŏ kăn bơ̆ jang ‘lơ̆ng dôm trong jang đơ̆ng Đảng, khôi luơ̆t tĕh đak tơ jur.

Dơ̆ng: Tơ blơ̆