VOV4.Bahnar - Khul jang đơ\ng An^h jang đảng dêh char Dak Lak ‘nao đei jơ bơ\ jang hăm Gru\p Hơp tak xăh dêh char găh tơ drong jang ato\k tơ iung mu\k drăm tơ pôl, mu\k drăm hơ dai păng tơ drong jang đơ\ng Gru\p Hơp tak xăh dêh char lơ\m 9 khei sơ năm 2019.

Hla ar chih tơ roi lơ\m jơ bơ\ jang ăn tơ băt, jo# truh đ^ khei 9/2019, lơ\m dêh char đei 506 hơp tak xăh, ako\m đ^ đăng bơ ngai jang dang 60.000 ‘nu. Lơ\m jơ bơ\ jang, Gru\p hơp tak xăh dêh char Dak Lak pơ ma tơ le\ch 1,2 nơ\r ap^nh nhen: ap^nh dêh char hơ nơ\ng tơ re\k, tơ le\ch jên tơ gu\m pơ tho pơ hrăm ăn kăn [o#, bơ ngai jang lơ\m Hơp tak xăh; sek tơ lang, tơ klăh hu\t dôm hơp tak xăh đei vă pơ tro\, pă đei jang xa bơih;…

Bí thư đảng dêh char Dak Lak athei tơ\ hơ năp kơnh, Gru\p Hơp tak xăh dêh char hơ nơ\ng hơ to\k tơ drong tơ roi tơ băt, hơ to\k tơ drong jang ato\k tơ iung mu\k drăm atu\m, mu\k drăm hơ dai; hơ to\k tơ drong pơ tho pơ hrăm ăn khul bơ ngai jang lơ\m hơp tak xăh; pơ jing hơp tak xăh jang xa rơ gei; pơ jing păng tơ le\ch jang ‘lơ\ng dôm tơ drong tơ gu\m hăm hơp tak xăh; ...

Dơ\ng: Tơ blơ\