VOV4.Bahnar - Khul kơ dră chĕp kơ̆l đảng dêh char Kon Tum ‘nao bơ̆ jang hăm Khul kơ dră chĕp kơ̆l đảng apŭng Ngọc Hồi. Lơ̆m jơ bơ̆ jang, Khul kơ dră chĕp kơ̆l đảng apŭng Ngọc Hồi athei Khul kơ dră chĕp kơ̆l đảng dêh char Kon Tum hơ nơ̆ng chih hơ dăh apŭng Ngọc Hồi tơ klep kơ jăp hăm ‘Măng jang sơ lam Bờ Y 'nŏh jĭ 1 lơ̆m dôm tơ ring jang mŭk drăm tơm kơ dêh char vă tưk tơ iung mŭk drăm, tơ gŭm ăn apŭng sơng đei lơ anih jang truh tơ mât jên jang xa, tĕch mơ dro, atŏk tơ iung anih jang, trong nơ năm pơ yoa ăn jang mŭk drăm, tơ pôl, tơ gŭm ăn apŭng jang đei tơ drong ‘mĕh vă jing tơ ring kơ drâm kơ loăi IV.

Pơ ma pơ tôch jơ bơ̆ jang, ƀok Dương Văn Trang - Bí thư đảng dêh char Kon Tum athei apŭng Ngọc Hồi tơ chĕng hơ len trong jang vă hơ met pơ ‘lơ̆ng dôm tơ drong tam mă lăp lơ̆m tơ drong jang atŏk tơ iung mŭk drăm, tơ pôl; năng kăl truh tơ drong atŏk tơ iung choh jang xa hăm kơ măy kơ mŏk 'nao, tơ plih ming 'long pơ tăm, hăm dôm kơ loăi 'long xa plei lăp hăm tĕh, tŏ 'mi kial tơ̆ âu; hơ len năng, pơih xă tơ ring tĕh pơ tăm 'long mắc ca vă atŏk tơ iung mŭk drăm; chĕp kơ̆l, pơ gơ̆r hơ met mă 'lơ̆ng vă 5 xăh hlôi jang đei tơ ring tơ rang 'nao hơ nơ̆ng jang tŏk 'lơ̆ng hlŏh dơ̆ng mă ưh 'nŏh jing xăh tơ ring tơ rang ‘nao 'lơ̆ng hơ iă.

Dơ̆ng: Tơ blơ̆