VOV4.Bahnar - Khŭl kơ dră chĕp kơ̆l pơ gơ̆r anih jang Đảng dêh char hlôi bơ̆ jang hăm Anih vei lăng pôk rơ̆ih dêh char Lâm Đồng găh tơ drong jang pôk rơih bơ ngai tang măt quốc hội jăl 15 păng bơ ngai tang măt Jơ nŭm pơ gơ̆r kon pơ lei rim tơ ring dêh char Lâm Đồng jăl jang 2021-2026. Truh khei ‘năr âu, tơ drong jang pôk rơ̆ih rim tơ ring đơ̆ng dêh char trŭh tơ̆ xăh, phường adoi jang kiơ̆ ƀlep trong jang păng ƀlep tơ drong hơgăt. Lơ̆m dêh char Lâm Đồng hlôi jang kiơ̆ jơ nei pơ ma dơ nuh ‘măng mă 2, kiơ̆ đơ̆ng noh drơ̆ng 1 nơ̆r hơ năn 13 ‘nu bơ ngai lĕch pơ jei pơm bơ ngai tang măt quốc hội, 131 ‘nu bơ ngai tang măt Jơ nŭm pơ gơ̆r kon pơ lei dêh char, bơ ngai tang măt Jơ nŭm vei lăng kon pơ lei rim apŭng pơ lei tơm ‘noh 800 ‘nu, tơ̆ xăh phường, thị trấn ‘noh 6.624 ‘nu. Tơ drong iŏk nơ̆r tơ gop đơ̆ng bơ ngai tăh hla tơ̆ anih oei sa hăm bơ ngai lĕch pơ jei pơm bơ ngai tang măt quốc hội păng bơ ngai tang măt Jơ nŭm pơ gơ̆r kon pơ lei rim tơ ring tŏk bŏk đei pơ gơ̆r jang kiơ̆ tơ păt, kơ jăp kiơ̆ ƀlep tơ drong hơ găt. Kơ dră chĕp kơ̆l anih jang Đảng dêh char Lâm Đồng tơ tă kăl kơ hơ nơ̆ng tŭn hrĕnh tơ drong jang kiơ̆ rim hơ yak pơ tăl dơ̆ng đơ̆ng tơ drong jang pôk rơ̆ih; hơ nơ̆ng hơ tŏk loi dơ̆ng tŭn pran tơ drong jang tơ roi tơ băt jrŭ să vă kơ kon pơ lei hlôh hơ dăh hơ năp jang ‘lơ̆ng gĭt kăl đơ̆ng pôk rơ̆ih.

Thuem: Tơ blơ̆