VOV4.Bahnar - Vă tơ gŭm păng pơ vih pơ văn tơ tom, đei yua ăn tơ drong jang tang găn jĭ Covid-19 lơ̆m pơ lei tơm Hồ Chí Minh păng rim tơ ring găh pơ băh, Thủ tướng teh đak ‘nao kĭ hla ar kơ sô̆ 970 găh tơ drong pơ jing “ grŭp bơ̆ jang gĭt kăl” tang găn jĭ covid-19. Thủ tướng athei rim Kơ dră tơm: Kơ dră Anih tơm vei lăng khŭl linh; Kơ dră Anih tơm vei lăng găh kơ măy kơ mŏk mơ dro sa; Kơ dră Anih tơm vei lăng găh chŏh jang sa păng hơ tŏk tơ iung tơ ring tơ rang; Kơ dră Anih tơm vei lăng găh trong nơ năm, gre kơ dâu; Kơ dră Anih tơm vei lăng ming man; Kơ dră Anih tơm vei lăng găh kơ tơ̆ng ang păng tơ roi tơ băt; Kơ dră Anih tơm vei lăng găh tơ drong jang sa - linh jĭ rơ ka păng tơ pôl lăng kiơ̆ tơ drong jang, hơ năp jang, tơ drong gơ̆h jang đei pơ jao, pơ jing hloi “ Grŭp bơ̆ jang gĭt kăl” tang găn jĭ Covid-19 đơ̆ng rim Anih tơm, jang hơ dai kơ jăp hăm pơ lei tơm Hồ Chí Minh păng rim tơ ring găh pơ băh, mă loi ‘noh jĭ rim tơ ring tŏk bŏk jang kiơ̆ tơ drong tơ chơ̆t 16 kơ chăng hơ met pơ ‘lơ̆ng hloi dôm tơ drong jang đei ƀôh lơ̆m tang găn tang găn jĭ păng dôm tơ drong ƀơm truh. ‘Nâu jĭ hơ năp jang tôch kơ gĭt kăl; Thủ tướng teh đak athei rim Kơ dră tơm akŏm pơ gơ̆r jang kiơ̆, jăh hơ tŏk đei yua hơ năp jang đơ̆ng Grŭp bơ̆ jang gĭt jăl.

Thuem: Tơ blơ̆