VOV4.Bahnar - Kiơ̆ tơ chơ̆t đơ̆ng khŭl kơ dră teh đak, pơ lei tơm Hồ Chí Minh hơ drin vei lăng đei jĭ hơ buh hơ drol kơ ‘năr 15/9/2021. Rim dêh char: Bình Dương, Long An, Đồng Nai hơ drin vei lăng đei hơ drol kơ ‘năr 1/9/2021. Rim dêh char, pơ lei tơm nai hơ drin  vei lăng đei jĭ hơ buh hơ drol ‘năr 25/8/2021. Vă hơ nơ̆ng akŏm tang găn, yak truh vei lăng ‘lơ̆ng jĭ COVID-19, ư̆h kơ lê̆ đei ƀôh rơ hiŭng rơ hiăng jang pơ gang, mŭk drăm - tơ pôl, Khŭl kơ dră teh đak drơ̆ng nơ̆r tơ lĕch ăn tơ drong tơ chơ̆t kơ sô̆ 86/NQ-CP găh rim trong jang kăl tang găn jĭ COVID-19. Tơ chơ̆t tơ roi rơ đăh rim trong jang kăl tơ lĕch jang. Mă hơ dăh ‘noh: tơ mơ̆t yua dôm trong jang tang găn jĭ, mă loi ‘noh jĭ jang kiơ̆ ư̆h kơ ăn yak vih vơ̆t lơ̆m kon pơ lei athei đei tơ lĕch jang tơ păt, kơ hret, pran kơ tang, hơ drin mă bơ nĕh, kơ jăp; hơ nơ̆ng chă pơ tho, vei lăng, dăr lăng rim tơ drong hiôk, trong jang tang găn jĭ hơ buh vă  ling lang pơm lăp hrĕnh mư̆h tơ drong jĭ hơ buh tơ plih. Đĭ đăng rim tơ ring athei jang kiơ̆ tơ păt trong jang kăl “ năm tơ̆ rim trong, tơ teh rim hnam, hơ len rim bơ ngai”, chă ƀôh, hơ met pơ ‘lơ̆ng hloi bơ ngai truh đơ̆ng tơ ring đei jĭ dăh mă truh đơ̆ng tơ ring nai kiơ̆ hơ găt đơ̆ng tơ ring; xek phak kơ hret dôm tơ drong pơm glăi, jô̆ hloi sek phak tơ drong yoch kiơ̆ tơ drong hơ găt đơ̆ng khôi luơ̆t hăm rim tơ drong pơm glăi ư̆h kơ pơm kiơ̆, pơ găn, tơ jră tơ drong jang kiơ̆ rim tơ drong hơ găt, trong jang tang găn jĭ hơ buh đơ̆ng anih jang đei kĭ ăn.

Thuem: Tơ blơ̆