VOV4.Bahnar - Kơ sơ̆ 25/3, tơ̆ anĭh jang kơ Khul kơ dră tĕh đak, Thủ tướng Nguyễn Xuân Phúc pơ gơ̆r tơ ƀâp muh măt pơ tôch jăl jang kơ Khul kơ dră tĕh đak đơ̆ng 2016 – 2021.

Pơ ma lơ̆m jơ tơ ƀâp, Thủ tướng Nguyễn Xuân Phúc akhan, 5 sơ năm âu ki jĭ jăl jang đei lơ tơ drong hơ iă, jĭ dôm khei ‘năr tơ găl kơ ƀlŏk băt hăm kơ dih kâu Thủ tướng păng lơ bơ ngai jang lơ̆m Khul kơ dră tĕh đak. Khul kơ dră tĕh đak drơ̆ng nơ̆r, mĭnh jơ hngâm vang yak hlŏh lơ tơ drong nol. Dôm bơ ngai jang lơ̆m Khul kơ dră tĕh đak tôch hưch hanh adrin đĭ jơ hngâm pơ vih ăn tĕh đak, pơ vih ăn kon pơ lei.

Tơ ƀôh đon hơ iă tơ̆ hơ năp tơ drong adrin atŭm mă ưh đei 1 ‘nu bơ ngai jang lơ̆m Khul kơ dră tĕh đak yơ ưh đei đon adrin vang iŏk jang dôm tơ drong trăp trĭn 5 sơ năm âu ki, Thủ tướng bơ nê đĭ đăng bơ ngai jang lơ̆m Khul kơ dră tĕh đak, dôm anĭh jang găh Khul kơ dră tĕh đak hơ nơ̆ng yak hơ doi, tơ gŭm ăn Thủ tướng jang đang hơ năp jang tôch trăp trĭn mă Đảng, Tĕh đak pơ jao ăn.

Thủ tướng hơ pơi ‘mĕh dôm bơ ngai jang lơ̆m Khul kơ dră tĕh đak, mă đơ̆ng tơ̆ hơ năp kơnh iŏk jang tơ drong kiơ, dăh mă pơ dơ̆h hưu, oei hơ nơ̆ng tơ iung jơ hngâm đon kăch mang, tơ gop ăn Đảng, ăn kon pơ lei, ăn tĕh đak, khŏm hơ nhăk tĕh đak Việt Nam jang tŏk pơ drŏng, hơ nŭk hơ noa.

Dơ̆ng: Tơ blơ̆