VOV4.Bahnar - Kơsơ̆ năr 5/11, Kơdră chĕp Dơnŏ anĭh Nội chính Trung ương Phan Đình Trạc atŭm hăm khŭl bơ̆ jang kơ Dơnŏ anĭh tơm Chĭnh trĭ hlôi bơ̆ jang hăm Khŭl kơdră chĕp pơgơ̆r Đảng pơlei tơm Đà Nẵng dăr lăng tơdrong tơlĕch jang kiơ̆ pơrô̆ pơrôp păng tơlĕch jang kiơ̆ kơtang tơdrong Tơchơ̆t Pơm lêh Hop akŏm Đảng lơ̆m tĕh đak ‘măng mă XIII.

Kơdră chĕp pơgơ̆r Hơnĭh jang Nội chính Trung ương bơ̆ jang hăm Dơnŏ anih Đảng pơlei tơm Đà Nẵng

Kiơ̆ trong tơlĕch jang păng trong pơ prŏ vă iung jang dăr lăng, Khŭl bơ̆ jang dăr lăng jang kiơ̆ kơ jăp trong pơ prŏ jang đơ̆ng Dơnŏ anih tơm Chĭnh trĭ hlôi tơlĕch ăn, iŏk đơ̆ng năr mônh giĕng kơnh, Khŭl gô bơ̆ jang hăm mĭnh ƀar hơnĭh jang Đảng găh Dơnŏ anĭh Đảng pơlei tơm Đà Nẵng nhen Khŭl Đảng Hơnĭh bơ̆ jang ăn Dơnŏ anĭh Đảng pơlei tơm, Dơnŏ anĭh bơ̆ jang Pơprŏ tơdrong jang păng Tơmơ̆t jên jang, Dơnŏ anĭh Nội vụ, Dơnŏ anĭh vei lăng Mŭk drăm păng Cham char, Dơnŏ anĭh Đảng Hơnĭh tơm Kŏng ty Ŭnh hơyŭh tơring Tŏk bŏk, Khŭl Đảng Dơnŏ anĭh vei lăng Hơnĭh jang Kmăi kmŏk hơgei-Rim Hơnĭh jang Kmăi kmŏk Đà Nẵng hăm Khŭl Kơdră Đảng Kuân Ngũ Hành Sơn. Lơ̆m sơnăm au, Đà Nẵng jing 1 lơ̆m 10 hơnĭh lơ̆m tĕh đak đei Dơnŏ anih tơm Chĭnh trĭ rơ̆ih năm dăr lăng tơdrong chĕp pơgơ̆r, pơrô̆ iung jang bơ̆ jang chă tơchĕng, hŏk pơhrăm, pơrô̆ păng tơlĕch jang kiơ̆ Tơdrong Tơchơ̆t Pơm lêh hop akŏm mă XIII kơ Đảng.

Tơblơ̆ nơ̆r: Amazưt