VOV4.Bahnar - Kơsơ̆ năr 24/9, Kơdră chĕp pơgơ̆r Kuô̆k hô̆i Vương Đình Huệ hlôi pơm tơm hop akŏm hăt hot Dơnŏ anĭh chĕp pơgơ̆r Kuô̆k hô̆i vă ăn tơgop nơ̆r găh tơdrong pơjing, tơlĕch jang kiơ̆ trong jang tơgŭm djru ăn bơngai jang păng tơngla hơvơ̆h đe jang đei ƀơm răm đơ̆ng jĭ hơbŭh Covid-19 pơrăm đơ̆ng Dơnŏ anĭh mong jên Ƀao hiêm hiong tơdrong jang. Iung pơma tơ̆ ‘măng hop akŏm, Kơdră chĕp pơgơ̆r Kuô̆k hô̆i Vương Đình Huệ tơbăt, khei năr au ki, Dơnŏ anĭh chĕp pơgơ̆r Kuô̆k hô̆i păng Khŭl kơdră Tĕh đak hlôi pơjing lơ trong jang tơgŭm djru gĭt kăl, akŏm lơ̆m rim trong jang tơgŭm djru ăn kon pơlei, hơnĭh mơdro sa yak hlŏh tơnap tap đơ̆ng jĭ hơbŭh Covid-19 pơrăm. Mă lei, tơ̆ hơnăp tơdrong jĭ hơbŭh Covid-19 pơrăm kơtang, kăl hơnơ̆ng đei rim trong jang tơgŭm djru ăn bơngai jang păng tơngla hơvơ̆h đe jang. Khŭl kơdră chĕp pơgơ̆r tĕh đak athei tơlĕch 30.000 ti hlak jên đơ̆ng akŏm rơkăh Hơnĭh mong jên Ƀao hiêm hiong tơdrong jang sơnăm 2020 vă tơgŭm djru ăn bơngai jang mĭnh ‘măng hăm kon jên; bơngai hơvơ̆h đe jang đei tơjur kon jên vang tơgop đơ̆ng 1% jur pă 0% Hơnĭh mong jên sa jên khei kơ dôm bơngai jang găh dôm bơngai vang răt yua ƀao hiêm hiong tơdrong jang hăm kon jên dang 8.000 ti hlak jên. Pơ đĭ ƀar trong jang tơgŭm au jei đei pơkăp lơ̆m Khôi luơ̆t Tơdrong jang sơnăm 2013, kơ yuơ lơ lŏh, tơdrong hơmet ming trong jang tơgŭm au kơ yuơ Kuô̆k hô̆i tơchơ̆t ăn.

Tơblơ̆ nơ̆r: Amazưt