VOV4.Bahnar - Pơgê năr 11/8, hlôi pơgơ̆r blŭng a ‘Măng hop akom mă blŭng Khŭl kơdră chĕp pơgơ̆r Tĕh đak jăl jang 2021-2026 tơlĕch jang kiơ̆ Tơdrong tơchơ̆t Pơm lê̆h hop akŏm mă XIII kơ Đảng păng Tơdrong tơchơ̆t kơ Kuô̆k hô̆i jăl XV găh atŏk tơ iung mŭk drăm-tơpôl 5 sơnăm 2021-2025. ‘Măng hop akŏm đei pơgơ̆r kiơ̆ trư̆k tuyên hăm rim tơring lơ̆m tĕh đak, kơ yuơ Thủ tướng Tĕh đak Phạm Minh Chính pơm tơm. Iung pơma pơgơ̆r blŭng a, Thủ tướng Tĕh đak Phạm Minh Chính pơma hơdăh, Khŭl kơdră chĕp pơgơ̆r tĕh đak jăl XV iŏk tơdrong jang lơ̆m khei ‘năr apŭng plĕnh tĕh păng lơ̆m tĕh đak đei dôm rơvơn păng tơnap tap, tơdrong long mơ̆t lĕch dĭh băl, mă kăl ‘nŏh tơdrong jĭ hơbŭh Covid-19 hăm sơmach  vir Delta tŏk bŏk pơrăm kơtang lơ̆m apŭng plĕnh tĕh păng tơ̆ Việt Nam, pơ joă jơhngơ̆m jăn kon pơlei păng pơm kơnê̆ kơtang trŭh rim tơdrong mŭk drăm-tơpôl kơ tĕh đak. Hăm vang hop akŏm đơ̆ng Tổng Bí thư păng đĭ đdăng rim kơdră chĕp pơgơ̆r Đảng, Tĕh đak, Khŭl kơdră chĕp pơgơ̆r tĕh đak jăl XV ‘măng blŭng, jei jing ‘măng hop akŏm gĭt kăl hloh, hăm hơdrin pơjing Khŭl kơdră chĕp pơgơ̆r tơplĭh ‘nao, tơpăt, bơ̆ jang gơ̆h hơgei, kơ yuơ kon pơlei bơ̆ jang. Hop akŏm hlôi akŏm pơma dơnŭh, drơ̆ng minh nơ̆r dôm tơdrong kăl lơ̆m rim tơdrong jang kơ tĕh đak lơ̆m 5 sơnăm kơnh.

Tơblơ̆ nơ̆r: Amazưt