VOV4.Bahnar - Xek kiơ̆ nơ̆r thei đơ̆ng Dơnŏ anĭh vei lăng kon pơlei kơ pơlei tơm Hồ Chí Minh găh tơdrong răt păng iŏk yua pơgang vaccine tang găn jĭ Covid-19, Kơ iĕng Thủ tướng tĕh đak Vũ Đức Đam ‘nao drơ̆ng nơ̆r hăm nơ̆r athei đơ̆ng Dơnŏ anĭh vei lăng kon pơlei kơ pơlei tơm Hồ Chí Minh găh tơdrong răt tơmơ̆t vaccine đơ̆ng tĕh đak đe. Bơ̆ jang pơgơ̆r jang kiơ̆, bơ̆jang tơbăt kăl vĕh ver tơdrong răt pơjei, atŏk kơ jă vaccine tŏk măt. Găh tơdrong tơlĕch ƀet vaccine tang găn jĭ Covid-19, Khŭl kơdră tĕh đak đei Tơdrong tơchơ̆t kơsô̆ 21/NQ-CP năr 26/2/2021 lơ̆m au đei tơdrong pơtrŭt rim hơnĭh jang đei rơvơn pơgơ̆r ƀet bơ̆ng ăn rim hơnĭh jang, rim bơngai ‘mĕh vă ƀet. Dơnŏ anĭh tơm jang pơgang chĭu pŭ ƀơk ăn hla bơar, dăr lăng hơlen, vei lăng ‘lơ̆ng vaccine kiơ̆ tơdrong tơchơ̆t; pơrô̆, pơtho tơbăt tơdrong ƀet bơ̆ng kiơ̆ trong tơlĕch jang, sơđơ̆ng, jơnei.

Tơblơ̆ nơ̆r: Amazưt