VOV4.Bahnar  – Ƀơ̆t tơbăt 80 xơnăm ‘Năr juăt jue bơngai xơnăm ‘lŏ Việt Nam (6/6), kơsơ̆ năr 4/6, Anih vei lăng kon pơlei dêh char Đăk Nông hlôi truh apong, pôk pơkao păng thơ thâu hơ iă hăm Jơnŭm Bơngai xơnăm ‘lŏ dêh char Đăk Nông. Anih vei lăng kon pơlei dêh char bơnê kơ dôm tơdrong tơgop đơ̆ng khul kang ƀô̆, bơngai jang xơnăm ‘lŏ lơ̆m khei năr âu ki, ưh adrô̆ yuk trong hơlâu ăn kon xâu hŏk pơhrăm lơ̆m rim tơdrong mă oei hăt hot plang trong, jơhngơ̆m pran vă tơ iung pơjing tơring roi năr roi hơtŏk. Anih vei lăng kon pơlei dêh char ‘meh vă khul kang ƀô̆, bơngai jang ‘lŏ xơnăm grăng pran, pơtoi plang jơhngơ̆m, mă hăt noh lơ̆m tơdrong jang “Xơnăm ‘lŏ kơ̆k ‘ngok roi rơgei, yuk trong hơlâu lơ̆m tơdrong tơ iung pơjing păng vei lăng teh đak”. Ƀơ̆t ‘măng tơjrâ̆m, Kơdră Jơnŭm Bơngai xơnăm ‘lŏ dêh char bơnê hăm tơdrong tơrĕk đơ̆ng khul kơpal dêh char lơ̆m tơdrong tơrĕk tơvei bơngai xơnăm ‘lŏ. Jơnŭm jang Bơngai xơnăm ‘lŏ dêh char pơtoi chĕp vei đon bơnôh, jang hadoi hăm tơring lơ̆m dôm tơdrong pơlong jang băt ‘mêm kơ teh đak, mă hăt noh pơtho pơhrăm khul mơlôh.

Lan chih păng pơre nơ̆r