VOV4.Bahnar - Tơ̆ hơ năp tơ drong krê hơ mơt đơ̆ng jĭ Covid 19 tơ̆ plt Hồ Chí Minh, Anih tơm vei lăng khul linh tơ tom ăn khul linh, gre tơ mam vang tơ gŭm ăn tơ drong tang găn jĭ.

Hrei ‘nâu 9/9 dêh char tơ̆ tơ ring quân khu 7 đei jĭ ngăl, lơ̆m nŏh krê hơ mơt hlŏh jĭ tơ̆ plt Hồ Chí Minh hăm rơ bâu ‘nu bơ ngai jĭ, đơ̆ng rŏng kơ ‘nŏh jĭ Bình Dương, Long An, Đồng Nai… Kiơ̆ nơ̆r pơ tho đơ̆ng Anih tơm vei lăng khul linh, Anih vei lăng Quân y păng Quân khu 7 hlôi tơ plih tơ drong jang đơ̆ng Hnam pơ gang Linh hăm kon pơ lei Tơ ring hơ lĕch jing Hnam pơ gang hơ met jĭ Covid 19 ăn khul linh păng kon pơ lei tơ̆ plt Hồ Chí Minh hăm 400 tŏ giơng păng pơm đang hnam pơ gang hơ met jĭ hăt hot kơ sô̆ 5A. 2 hnam pơ gang âu oei hơ met ăn 581 ‘nu bơ ngai jĭ, kơ sô̆ âu oei tŏk hơ nơ̆ng tơ̆ tơ ring. Thiếu tướng, PGS.TS Nguyễn Hồng Sơn, Kơ dră chĕp kơ̆l Hnam pơ gang 175 ăn tơ băt, hnam pơ gang oei apinh hơ tŏk kơ sư̆k set hơ len jĭ covid păng đei rơih jĭ 1 ƀet bơ̆ng ăn đĭ đăng kon pơ lei vă tang găn jĭ, dang ei hnam pơ gang oei adrin tơ lĕch tơ drong jang ‘nâu:

“Ƀât jĭ iung dêh âu ki, Hnam pơ gang 175 chă ƀôh hlŏh 120 ‘nu bơ ngai jĭ lơ̆m tơ pôl mưh chă khăm hơ len. 1 ‘nu linh lơ̆m Hnam pơ gang 175 tơ pŏh jĭ mư̆h bơ̆ jang lơ̆m anih khăm hơ len blŭng a. Nhôn apinh anih vei lăng Quân y vă pơm 'lơ̆ng hlŏh rim tơ drong khăm hơ met păng vei lăng sơ đơ̆ng tơ drong jang ăn hnam pơ gang, ưh ƀơm ưh 'lơ̆ng truh đon kơ chăng jang đơ̆ng hnam pơ gang. Hnam pơ gang oei apinh ƀơk thim kơ măy set hơ len jĭ kơ dâu kơ dih, kĕ set hơ len truh 1 rơ bâu kơ mẫu 1 năr, vă pơm 'lơ̆ng, lăp hăm tơ drong 'mĕh vă tơ̆ yăn âu.” 

Đe y, ƀak si Quân khu 7 năm jang tơ gŭm ăn plt Hồ Chí Minh tang găn jĭ

Vang tơ gop tang găn jĭ, khul linh tĕh đak păng quân khu 7 hlôi ăn lơ gre chă set hơ len jĭ păng kơ măy set hơ len jĭ đei kơ sư̆k tih. Quân khu 7 pơm 55 anih oei hơ drô̆ ăn dôm bơ ngai F1 hăm hlŏh 12 rơ bâu 500 tŏ giơng. Atŭm hăm ‘nŏh pơ jing 68 khul grŭp năm tang găn jĭ, lơ grŭp hơ met jĭ, 51 grŭp chă bơ ngai jĭ, hlŏh 200 grŭp set hơ len jĭ hăm hlŏh 37 rơ bâu 800 kơ mẫu, ƀet ăn hlŏh 10 rơ bâu 900 jrŭm vác xin ăn kon pơ lei vang tơ gop jơ hngâm tang găn jĭ tơ̆ plt Hồ Chí Minh. Kŭm hăm Hnam pơ gang linh hăm kon pơ lei Tơ ring Hơ lĕch păng Hnam pơ gang hơ met jĭ hăt hot kơ sô̆ 5A chă hơ met ăn bơ ngai jĭ covid tơ̆ plt Hồ Chí Minh păng dôm dêh char tơ jê̆, Quân khu 7 oei pơm Hnam pơ gang hơ met jĭ hăt hot kơ sô̆ 5B kiơ̆ nơ̆r pơ tho đơ̆ng Anih tơm vei lăng khul linh tĕh đak vă pơm lăp hăm tơ drong tang găn, hơ met jĭ tơ̆ tơ ring.

Thiếu tướng Võ Văn Tri, Phŏ Kơ dră chĕp kơ̆l khul linh Quân khu 7 ăn tơ băt: “Nhôn vă pơm hnam pơ gang hơ met jĭ hăt hot kơ sô̆ 5B, dôm tơ drong hơ met đĭ jang đang ngăl bơih. Mưh đei nơ̆r athei pơm hnam pơ gang hơ met jĭ hăt hot kơ sô̆ 5B păng nơ̆r tơ chơ̆t đơ̆ng kơ pal athei pơ truh khul bơ ngai jang găh quân đoàn 4 păng binh đoàn 16 ‘nŏh, ưh kơ đunh dang 5 jơ đĕch nhôn pơ jing hloi hnam pơ gang hơ met jĭ 5B, păng lơ̆m dang 24 jơ nhôn gơ̆h tơ mât yoa, ăn hnam pơ gang bơ̆ jang hloi bơih. Hnam pơ gang đei 150 ‘nu bơ ngai jang, yoa dôm hnam pơ gang lơ̆m quân khu păng quân đoàn 4, binh đoàn 16 pơ truh bơ ngai jang”

Khul linh oei pơ tho ăn dôm khul jang vang jang hơ doi sơng iŏk, vei lăng 4.511 ‘nu kăn ƀô̆, bơ ngai jang pơ gang đei nơ̆r athei năm jur jang tơ̆ dôm tơ ring lơ̆m quân khu 7. Lơ̆m nŏh hơ drô̆ năm jang tơ̆ plt Hồ Chí Minh đei 4.025 ‘nu kăn ƀô̆, bơ ngai jang tang găn jĭ. Thượng tướng Vũ Hải Sản, Phŏ Kơ dră tơm vei lăng khul linh tĕh đak ăn tơ băt, tơ drong jĭ oei tôch krê hơ mơt tơ̆ plt Hồ Chí Minh, Anih tơm vei lăng khul linh hlôi krao akŏm bơ ngai, akŏm gre tơ mam tơ̆ dôm quân khu păng kơ đông linh vang mât jang tơ̆ quân khu 7, akŏm bơ ngai ăn tơ drong jang tang găn jĭ păng kơ chăng tơ blăh, chih hơ dăh ‘nâu jĭ tơ drong jang tôch gĭt kăl nhen thoi năm tơ blăh hăm tơ drong nol ưh đei băt hơ drol:

“Khul linh tĕh đak pơ truh ăn Quân khu 7, khul pruih pơ gang pơ lôch pơ rang jĭ hlŏh 20 tŏ gre. Anih tơm vei lăng khul linh tĕh đak pơ jao tơ drong jang ăn đĭ đăng Quân đoàn 4, Ƀô đôĭ jang pơ gang păng Quân khu 7 yoa kon pơ lei athei bơ̆ jang prăt măng prăt năr kiơ̆ nơ̆r athei đơ̆ng tơ ring jô̆ hloi plt Hồ Chí Minh, Đồng Nai, Bình Dương păng dôm dêh char. Hơ drô̆ Quân y hlôi pơ truh ăn Quân khu 7 đei 270 ‘nu bơ ngai jang păng kơ tơ mam, kơ măy kơ mŏk ki thuơ̆t vă tơ gŭm ăn quân khu 7, mă loi ‘nŏh jĭ plt Hồ Chí Minh.”

Ưh lăp tơ gŭm ăn plt Hồ Chí Minh păng dôm dêh char đei jĭ tơ jê̆ ‘nŏh hăm khul năm tang găn jĭ hơ drol đĕch, khul linh tĕh đak oei adrin pơ vih pơ văn, tơ gŭm ăn kon pơ lei tơ̆ anih oei hơ drô̆ vă pơm tơ jur ƀiơ̆ mơ mat tat. Dôm năr âu ki, đei lơ khul linh vang tơ gŭm ăn kon pơ lei tơ̆ plt Hồ Chí Minh hlŏh 70 tân ‘nhot, ƀum, plei ‘long, hlŏh 41 rơ bâu tŏ kơ tăp iĕr, 50 tân phe, rơ bâu kơ thŭng mi tôm păng lơ tơ mam yoa kăl nai hai. Kiơ̆ dôm tơ drong jang “vang tơ gŭm băl”, “Hnam ‘mêm mơ nat linh hăm kon pơ lei”, “siêu thĭ rơ gŏh”, “phe asong đĕch”, “tơ mam asong đĕch”… lơ tơ mam xa đơ̆ng tơ pang ti đe linh hlôi truh hăm kon pơ lei, pơm pơ čhơp jơ hngâm ăn kon pơ lei tơ̆ tơ ring oei pơ gang găn, vang tơ gop jơ hngâm tơ gŭm băl yak hlŏh mơ mat tat, khŏm tang găn đei tơ drong jĭ.

Dơ̆ng: Tơ blơ̆