VOV4.Bahnar - Pơ gê 1/6, Anih tơm vei lăng khul linh tĕh đak pơ gơ̆r Hop akŏm trư̆k tuyê̆n lơ̆m khul linh tơ lĕch tơ drong jang, trong vă jang gĭt kăl tang găn jĭ Covid 19 lơ̆m khul linh truh tơ̆ 187 anih pơih pơ dăh. Jĭ tơ pŏh ‘măng mă 4 âu, dôm khul linh hlôi hơ tŏk hlŏh 1.000 ‘nu bơ ngai năm jang tơ gŭm tơ̆ Bắc Ninh păng Bắc Giang, lơ̆m nŏh đei khul chă set hơ len jĭ păng 43 grŭp năm ƀet iŏk pham vă set hơ len jĭ.

Kŭm tơ̆ Bắc Ninh, Bắc Giang, Anih tơm vei lăng khul linh tĕh đak pơm 3 hnam pơ gang hơ met jĭ tơ pŏh vă hơ met ăn bơ ngai jĭ Covid 19, hlôi sơng iŏk hơ met jĭ ăn 641 ‘nu bơ ngai. Đơ̆ng blŭng sơ năm truh dang ei, dôm quân khu, Anih chĕp kơ̆l pơ gơ̆r khul linh dôm dêh char, plt kơ chăng tơ lĕch lơ trong tang găn jĭ păng tơ gŭm ăn dôm tơ ring tang găn jĭ.

Anih tơm vei lăng khul linh tĕh đak oei vei lăng 1.906 grŭp gak, hăm hlŏh 12.800 ‘nu bơ ngai vă vei lăng tơ ring sơ lam, găn ưh ăn bơ ngai mât lĕch glăi luơ̆t. Đơ̆ng blŭng khei 5 truh dang ei, dôm anih gak, vei lăng tơ ring sơ lam pơ jao ăn tơ ring chơ mât tơ̆ anih oei hơ drô̆ hăm vă jê̆ 5.000 ‘nu bơ ngai, lơ̆m nŏh đei hlŏh 1.800 'nu bơ ngai mât lĕch glăi luơ̆t, mă lơ 'nŏh tơ̆ trong sơ lam hăm Campuchia păng Trung Quốc.

Dơ̆ng: Tơ blơ̆