VOV4.Bahnar - Sơ năm 2021 đei ƀĕnh tơ drong ưh ‘lơ̆ng đơ̆ng jĭ covid 19 tŏk bŏk vă hlôi bơih, mă lei hăm đe linh păng kon pơ lei tơ̆ tơ ring đei jĭ, ‘nŏh jĭ 1 sơ năm đei ƀĕnh jơ hngâm đon ‘mêm băl đơ̆ng linh hăm kon pơ lei păng dơ doă đe linh.

Lăp 2,3 jơ đơ̆ng rŏng đei nơ̆r athei, 1 hnam pơ gang hơ met jĭ tơ pŏh đei pơ jing, 1 anih set hơ len jĭ đei pơ jing ‘năi; tam truh 48 jơ, 1 ‘măng năm bơ̆ jang tôch hrĕnh đei tơ lĕch hăm tôm kơ măy kơ mŏk ‘nao păng khul bơ ngai jang đơ̆ng Hà Nội yak hlŏh rơ bâu km mât tơ̆ pơ lei tơm (plt) Hồ Chí Minh păng dôm dêh char găh Pơ băh tơ gŭm ăn dôm tơ ring tang găn jĭ. ‘Nŏh jĭ dôm ‘măng năm bơ̆ jang tôch hrĕnh lơ̆m chăl rơ ngei đơ̆ng Ƀô đô̆i Ƀok Hô tơ̆ hơ năp “hơ yăt Covid-19”.

Thượng tướng Võ Minh Lương, Phŏ Kơ dră tơm vei lăng khul linh tĕh đak ăn tơ băt: “Tơ̆ hơ năp tơ drong ‘nŏh, Anih tơm vei lăng khul linh kơ plăh dŏh athei pơm hloi 9 tŏ hnam pơ gang hơ met jĭ, kŭm hăm 175, kŭm hăm khul linh jang pơ gang tơ ring Hơ lĕch pơ jing 2 anih hơ met jĭ ăn bơ ngai jĭ covid.”

Tơ drong hơ met jĭ oei jing tơ drong nol jô̆ hloi đơ̆ng găh bơ ngai jĭ, ƀât mă lơ bơ ngai ưh chu hơ met jĭ, plĕh hŭt kơ măy, tơ mam hơ met jĭ đơ̆ng hơ kâu, hil, blei hyap, druh tĕh đe ƀak si păng bơ ngai jang pơ gang... Mă lei đơ̆ng đon hlôh vao, đe ƀak si, khul linh jang pơ gang oei adrin vei lăng tôch ai. Nhen nơ̆r tơ roi đơ̆ng Thượng tá Vũ Đình Ân, tơ̆ Anih hơ met ăn bơ ngai jĭ Covid: “Bơ ngai jĭ ưh gơ̆h dui jơ hngâm, pơm ăn đe sư hli, čhok lơ̆m jơ hngâm yoa lơ̆m ‘ngok ưh măh ô xy, tơ dăh bơ̆n ưh kơ mơ nat ăn đe sư ‘nŏh jing pơm glăi, gô pơm ăn bơ ngai jĭ lôch răm.”

Oei Thiếu tướng Nguyễn Hồng Sơn, Kơ dră chĕp kơ̆l Hnam pơ gang Quân y 175 tơ roi: “Hmă hmă 1 ‘nu bơ ngai jĭ ‘nŏh đĭ hnam pơ ngơ̆t, năr ‘nâu bơ ngai âu, tơ ning bơ ngai to. Mă lei tơ̆ âu ‘nŏh lăp 1 ‘nu đĕch, dôm ‘măng dui jơ hngâm mơ mat tat đơ̆ng bơ ngai jĭ Covid 19 sư krê hơ mơt pă băt dang yơ.”

Jĭ hơ buh Covid tơ pŏh tơ̆ plt Hồ Chí Minh đei kơ jăp lơ̆m jơ hngâm đon đe tơ dăm ‘nao hlŏh 20 sơ năm nhen Dương Thanh Hoàng, tơ̆ Anih chĕp kơ̆l pơ gơ̆r khul linh kuơ̆n 7, Anih chĕp kơ̆l khul linh plt păng lơ bôl boăl lơ̆m dôm khul jang gĭt kăl: Hơ met pơ ‘lơ̆ng hơ kâu bơ ngai lôch yoa đơ̆ng jĭ Covid-19 oei đei lơ tơ drong ưh kơ kĕ hiơt. Đe ‘nhŏng athei chơ̆n jơ hngâm, hơ met ming đon tơ chĕng, tơ drong hli vă kŭm hăm bôl boăl chông ba tơ̆ jăl trong mă hơ tuch hăm kon pơ lei ưh pŭn ai lôch răm hăm đon kơ chăng tôch ai, ‘mêm mơ nat păng kŭp yom mưh chă pơ jao kơ ting bơ ngai lôch đơ̆ng rŏng kơ sŏh hơ met ăn unh hnam đe sư: “Năr dêh hlŏh nhôn đei đơ̆ng 10-15 ‘nu bơ ngai lôch 1 năr, ƀât lăp nhôn brŏk đĭ măng bơih mă lei iŏk đei dơ̆ng nơ̆r krao, nhôn năm hơ lơ̆k dơ̆ng truh pơ gê đơ̆ng rŏng ‘mơ̆i gơ̆h vih.”

Ưh lăp jang kơ tă tơ̆ anih tang găn virus Sars Covi 2 blŭng a đĕch, khul linh ƀô đô̆i oei vang bơ̆ jang lơ̆m rim tơ drong đơ̆ng ăn oei hơ drô̆ truh vei lăng tơ drong arih xa ăn kon pơ lei, vei sơ đơ̆ng tơ pôl. Khul linh hlôi iŏk bơ̆n gre păr, gre tang vang vă chơ pơ dŭ tơ mam pơ gang, tơ mam yoa kăl pơ truh ăn rim hnam pơ gang, rim tơ ring kon pơ lei oei xa. Bơ ngai hơ kâu lĕch ƀĕnh đak pơ uh pơ ang yoa ‘năr tŏ, dăh mă hơ ‘yuih đơ̆ng ‘mi tơih mă lei rim kơ hôp pơ gang, rim kĭ phe, kơ tăp iĕr, hơ chô̆ ‘nhŏt oei chĕp vei tôch ‘lơ̆ng ba truh tơ pang ti kon pơ lei lơ̆m khei ‘năr tơ ƀâp tơ drong mơ mat tat. Tơ drong adrin hiơt kơ dih kâu đơ̆ng đe ‘nhŏng đei kon pơ lei tôch bơ nê: “Duch ưh băt vă pơ ma kiơ, lăp pôm bơ nê kơ đĭ đăng, kŭm gơ gơm đơ̆ng đe ma mă gơ̆h đei thoi noh, oei unh hnam duch ưh băt vă pơm thoi yơ. Bơ nê lơ tơ pă.”

Khul kơ dră dôm tơ ring đei jĭ tơ chĕng ‘lơ̆ng tơ drong tơ gop jơ hngâm tôch pơ nĕh, đei yoa đơ̆ng khul linh lơ̆m khei ‘năr mơ mat tat dêh hlŏh. Phó Bí thư Đảng plt, Kơ dră vei lăng kon pơ lei plt Hồ Chí Minh Phan Văn Mãi ăn tơ băt: “Ƀô đô̆i ưh lăp tơ blăh kiơ̆ nơ̆r athei đơ̆ng ƀok yŏng đĕch, mă oei tơ blăh kiơ̆ plei nuih băt ‘mêm đơ̆ng kơ dih dơ̆ng, ƀô đô̆i hlôi truh hăm kon pơ lei ƀât mă kon pơ lei oei tôch mơ mat tat, hơ nat hơ not, kon pơ lei jĭ jăn, ƀât kon pơ lei oei tơ jră hăm tơ drong lôch arih, ƀât lăp athei pơ ngơ̆t ăn ‘nhŏng ŏh ưh pŭn lôch răm hai. Inh tơ chĕng lơ̆m jơ hnơr arih kơ khul linh gô đei chăl ‘nao tôch hơ iă dơ̆ng hăm đe ƀô đô̆i vang tơ gŭm ăn kon pơ lei tang găn jĭ.”

Lơ̆m tơ drong tơ blăh hăm “hơ yăt ưh đei um ai” ‘nŏh jĭ tơ drong jĭ Covid-19 vă jê̆ 2 sơ năm âu ki, 1 ‘măng dơ̆ng tơ ƀôh hơ dăh dôm tơ drong juăt ‘lơ̆ng hơ iă đơ̆ng Khul linh kon pơ lei Việt Nam, ‘nŏh jĭ: “Mă đơ̆ng đei tơ drong mơ mat tat dang yơ, khul linh oei hơ nơ̆ng jing khul năm hơ drol ngăl”. Lơ̆m rim tơ drong, um rup ƀô đô̆i Ƀok Hô hơ nơ̆ng jing anih gơ nang tôch kơ jăp hăm kon pơ lei. Lăp jô̆ hơ drô̆ lơ̆m ‘măng jĭ tơ pŏh mă 4, Anih tơm vei lăng khul linh hlôi pơ gơ̆r krao akŏm, vơ̆h khul linh năm bơ̆ jang tih hlŏh jô̆ đơ̆ng rŏng kơ tơ blăh sơ̆, hăm tơ drong athei hlŏh 130.000 ‘nu linh năm tơ gŭm ăn plt HCM păng dôm dêh char găh Pơ băh tang găn jĭ Covid-19.

 Nguyên Nhung: Chih

Dơ̆ng: Tơ blơ̆